एजेन्सी – स्वर्ण पदकका दावेदार दुई टोली फ्रान्स र अर्जेन्टिना टोकियो ओलम्पिक २०२० अन्तर्गत पुरुष फुटबलको समूह चरणबाटै बाहिरिएका छन् ।

फ्रान्स समूह चरणको अन्तिम खेलमा घरेलु टोली जापानसँग ४–० को लज्जास्पद हार बेहोर्दै समूह ‘ए’ बाट समूह चरणबाटै बाहिरिएको हो । यो समूहको अन्तिम खेलमा फ्रान्स जापानसँग पराजित तथा अर्काे खेलमा मेक्सिकोले दक्षिण अफ्रिकालाई ३–० ले हराएपछि फ्रान्सको अघिल्लो चरणको यात्रामा पुर्ण विराम लागेको हो ।

यो समूहबाट जापान शतप्रतिशत जित निकाल्दै समूह विजेता बन्दा मेक्सिको ६ अंक जोडेर समूह उपविजेता बन्यो । फ्रान्सले ३ तथा दक्षिण अफ्रिकाले अंकको खात खोल्न सकेन । बुधबार निसान स्टेडियममा फ्रान्सलाई लज्जास्पद हार चखाउन जापानका ताकेफुसा कुवो, हिरोकी साकाई, कोजी मियोसी र दाइजेन माइदाले गोल गरे ।

७२औं मिनेटमा फ्रान्स १० खेलाडीमा समेटिनु अघि नै जापानले ३–० को आरामदायी अग्रता लिइसकेको थियो । फ्रान्सका रान्डल कोलो मुआनी सिधै रातो कार्ड खाँदै मैदानबाट बाहिरिदा फ्रान्स थप समस्यामा परेको थियो ।

समूह ‘सी’ मा स्पेनसँग १–१ गोलको बराबरी खेलेपछि अर्जेन्टिनाले पनि समूह चरण पार गर्न सकेन । स्पेनका लागि मिकेल मेरिनोले गोल गर्दा अर्जेन्टिनाका लागि थोमस बेलमोन्टेले बराबरी गोल फर्काएपनि टोलीलाई अघिल्लो चरणमा पुर्‍याउन सकेनन् ।

यो समूहबाट स्पेन ५ अंक जोडेर समूह विजेता बन्दा इजिप्ट उपविजेताको रुपमा अघि बढ्यो । इजिप्टसँग समान ४ अंक भएपनि अर्जन्टिना गोल अन्तरमा पछि पर्‍यो । बुधबारै इजिप्टले अष्ट्रेलियालाई २–० ले पराजित गर्दै अन्तिम आठमा स्थान पक्का गर्दा अष्ट्रेलियाले पनि समूह चरण पार गर्न सकेन ।

समूह ‘बी’ बाट दक्षिण कोरिया विजेता तथा न्युजिल्यान्ड उपविजेता बन्दा रोमानिया र होन्डुरस बाहिरियो । समूह ‘डी’ बाट ब्राजिल समूह विजेता बन्दा आइभोरी कोस्ट उपविजेता बन्यो । जर्मनी र साउदी अरेवियाले समूह चरण पार गर्न सकेनन् ।

क्वाटरफाइनल समिकरण

स्पेनविरुद्ध आइभोरी कोस्ट (३१ जुलाई, दिउँसो १:४५ बजे)

जापानविरुद्ध न्युजिल्यान्ड (३१ जुलाई, दिउँसो २:४५ बजे)

ब्राजिलविरुद्ध इजिप्ट (३१ जुलाई, दिउँसो ३:४५ बजे)

दक्षिण कोरियाविरुद्ध मेक्सिको (३१ जुलाई, दिउँसो ४:४५ बजे)