एजेन्सी – टोकियो ओलम्पिक अन्तरगतको महिला फुटबलमा उच्च प्रदर्शन गरिरहेको स्वीडेनले समूह चरणमा शतप्रतिशत जित निकाल्दै क्वाटरफाइनलमा पुग्न सफल भएको छ ।

समूह ‘जी’ को अन्तिम खेलमा स्वीडेनले न्युजिल्यान्डलाई २–० ले पराजित गर्दै समूह विजेताको रुपमा अन्तिम आठमा स्थान पक्का गरेको हो । स्वीडेनले यसअघि बलियो अमेरिकालाई ३–० ले तथा अष्ट्रेलियालाई ४–२ ले पराजित गरेको थियो ।

कासिमा सकर स्टेडियममा मंगलबार भएको खेलमा स्वीडेनको सहज जितमा अन्ना एन्भेगार्ड र माडेलेन जानोगेले गोल गरिन् । दुवै गोल पहिलो हाफमा सम्भव भएको थियो ।

खेलको १७औं मिनेटमा अन्ना एन्भेगार्डले गोल गर्दै स्वीडेनलाई १–० को अग्रता दिलाइन् । ३०औं मिनेटमा माडेलेन जानोगेले गोल गर्दै स्वीडेनको अग्रता दोब्बर पारिन् । त्यसपछि थप गोल निस्कन नसक्दा पहिलो हाफको दुई गोल नै स्वीडेनको जितमा निर्णायक बन्यो ।

यही समूहको अर्काे खेलमा अमेरिका र अष्ट्रेलियाले गोलरहित बराबरी खेल्दै अंक बाँडेका छन् । समूह ‘जी’ को यो नतिजा पछि स्वीडेन ९ अंक जोडेर अघिल्लो चरण प्रवेश गर्दा ४ अंक जोडेको अमेरिकाले समूह उपसवजेताको रुपमा क्वाटरफाइनलमा स्थान पक्का गरेको छ ।

अमेरिकासँग समान ४ अंक रहेपनि तेस्रो स्थानमा रहेको अष्ट्रेलियाको अर्काे चरण पुग्ने सम्भावना जीवित छ । न्युजिल्यान्ड अंकविहीन हुँदै समूह चरणबाट बाहिरिएको छ ।