काठमाडौं (हाम्रो खेलकुद) – सहिद स्मारक ए डिभिजन लिग पूर्व निर्धारित समयमै सुरु गर्न सबै ए डिजिभन क्लब सहमत भएपनि खेलाडीको स्वास्थ्य र सुरक्षालाई भने विशेष ध्यान दिनुपर्ने आवाज उठाएका छन् ।

एन्फाले ए डिभिजन र राष्ट्रिय लिगसँगसँगै सुरु गर्ने योजनाका साथ आइतबार सम्म टिम दर्ताका लागि समयावधि तोकेको थियो । तर केहि दिन अघि ए डिभिजनका ४ क्लब थ्री स्टार, बिग्रेड ब्वाइज, फ्रेन्ड्स र जावलाखेल युथले कोरोनाका देखाउँदै असोज ३ गतेबाट लिग गर्दा स्वास्थ्य मापदण्डबारे तयार नभएको भन्दै ध्यानाकर्षण गरेको थियो ।

त्यहि कारण एन्फाले १४ ए डिभिजन क्लबका प्रतिनिधिसँग आइतबार छलफल गरेको एन्फाले जनाएको छ । विज्ञप्तिमा झैं  ब्रिगेड ब्वाइजका अध्यक्ष लालकुमार पुनले खेलाडीको स्वास्थ्यलाई प्राथमिकतामा राखिनुपर्ने बताएका छन् । स्वास्थ्य मन्त्रालयले कोभिड १९ को तेस्रो लहर आउने सम्भावना रहेकोले त्यसलाई ध्यानमा राखेर लिग गर्नुपर्ने सुझाएका थिए । थ्री स्टारका महासचिव सञ्जिव शिल्पकारले ४ क्लबले संयुक्त ज्ञापन पत्र दिनुको अर्थ लिग रोक्न नभई विधिवत लिग होस् भन्ने चाहेको प्रष्ट पारे ।

सातदोबाटो युथ क्लबका अध्यक्ष कोपिला राना मगर सबै क्लब तयारीमा छुटेकोले खराब अवस्थामा पनि कसरी लिग गर्ने भन्ने योजना हुनुपर्ने बताए । छलफलमा एपिएफका पंकज चन्द, हिमालयन शेर्पाका विजेन पुडासैनी, फ्रेन्ड्सका अध्यक्ष दीपक थापा, जाउलाखेलका महेन्द्र क्षेत्रीले पनि आफ्नो धारणा राखेका थिए । त्यस्तै न्यूडरोड टिम एनआरटीका अध्यक्ष सुन्दर जोशी, नेपाल पुलिसका अनन्त थापा, संकटाका कार्यवाहक अध्यक्ष सुरेन्द्र सिख्राकार, च्यासल युथका प्रदीप व्यञ्जनकार र त्रिभुवन आर्मी फुटबल क्लबका अध्यक्ष शशीकिरण रायमाझीले पनि लिग आयोजनाका विषयमा बोलेका थिए ।

अधिकांशले खेलाडकिो स्वास्थ्यलाई पहिलो प्रथामिकतामा राखेर लिग सञ्चालन गर्नुपर्नेमा जोड दिएका थिए । एन्फाका अध्यक्ष कर्मा छिरिङले खेलाडीको स्वास्थ्यलाई उच्च प्राथमिकतामा राखेर लिग सञ्चालन गरिने योजना बनाएको बताए । ‘फुटबल कुनै पनि मुल्यमा हुनुपर्दछ । सरकारसँग अनुमति लिइसकेका छौं’, अध्यक्ष शेर्पाले भने, ‘हामी स्वास्थयका सबै मापदण्ड अपनाएर नै लिग गर्नेछौं ।’

उनले कोरोना महामारीका कारण कठीन परिस्थितिमा पनि अन्तर्राष्ट्रिय फुटबल सञ्चालन भएको उदाहरण दिदै त्यसैको अनुभवलाई ध्यानमा राखेर ए डिभिजन गरिने विश्वास दिलाए । क्लबहरुकाबीच अर्को आइतबार छलफल गरि लिगका बारेमा अन्तिम टुंगो लगाइने एन्फाले जनाएको छ ।

छलफलमा एन्फाका वरिष्ठ उपाध्यक्ष पंकज विक्रम नेम्बाङ, महासचिव इन्द्रमान तुलाधार, प्रवक्ता किरण राई, लिग समितिका संयोजक, लिगका निर्देशक सञ्जिव मिश्रलगायतको उपस्थिति थियो ।