एजेन्सी – पहिलो खेलमा स्वीडेनसँग स्तब्ध बनेको अमेरिकाले टोकियो ओलम्पिक २०२० अन्तरगतको महिला फुटबलमा न्युजिल्यान्डमाथि सानदार जित दर्ता गरेको छ ।

अमेरिकाले न्युजिल्यान्डमाथि ६–१ को सानदार जित हात पारेको हो । अमेरिका पहिलो खेलमा स्वीडेनसँग ३–० ले स्तब्ध बनेको थियो । अमेरिकाको फराकिलो जितमा रोस लाभेली, लिन्डसे होरान, क्रिस्टेन प्रेस र एलेक्स मोर्गानले गोल गर्दा दुई आत्मघाती गोल उपहार पाएको थियो । न्युजिल्यान्डकी बेट्से हास्सेटले एक गोल फर्काइन् ।

साइतामा स्टेडियममा शनिबार गोलको वर्षा भएको खेलमा अमेरिकाले पहिलो हाफमा दुई गोलको अग्रता लिदा दोस्रो हाफमा ४ गोल थप्दा एक गोल खान पुगेको थियो । नवौं मिनेटमा रोस लाभेलीले गोल गर्दै अमेरिकालाई सुरुवाती अग्रता दिलाइन् । ४५औं मिनेटमा लिन्डसे होरानले गोल गर्दै अमेरिकाको अग्रता दोब्बर पारिन् ।

६३औं मिनेटमा एबी इर्सेगले आत्मघाती गोल गरेपछि अमेरिका सहज जिततर्फ अघि बढेको थियो । ७३औं मिनेटमा बेट्से हास्सेटले गोल गर्दै न्युजिल्यान्डलाई खेलमा फर्कने संकेत दिदा स्कोर ३–१ भएको थियो । ८०औं मिनेटमा क्रिस्टेन प्रेसले गोल गर्दै अमेरिकालाई ४–१ ले अघि बढाइन् ।

८७औं मिनेटमा एलेक्स मोर्गानले गोल गरेपछि अमेरिकाले खेलमा ५–१ को आरामदायी अग्रता लिन सफल भयो । खेलको अन्तिम समयमा क्याथरिन बोटले आत्मघाती गोल गरेपछि अमेरिकाले फराकिलो जित निकाल्न सफल भयो ।

यो जितसँगै अमेरिका समुह ‘जी’ मा २ खेलबाट ३ अंक जोडेर दोस्रो स्थानमा उक्लन सफल भएको छ । समान ३ अंक भएपनि गोल अन्तरमा पछि पर्दै अष्ट्रेलिया तेस्रो स्थानमा छ । पराजित न्युजिल्यान्ड अंकविहीन हुदै पुछारमा छ । स्वीडेन ६ अंक जोडेर शीर्षस्थानमा रहेको छ । शनिबारै स्वीडेनले अष्ट्रेलियामाथि ४–२ को जित निकालेको थियो ।