एजेन्सी – टोकियो ओलम्पिक २०२० अन्तरगतको महिला फुटबलमा ब्राजिल र नेदरल्यान्ड्सले रोमाञ्चक बराबरी खेलेका छन् । खेलमा दुई पटक पछि परेको ब्राजिजले पुनरागमन गर्दै अघि बढेपनि अन्तिम समयमा डच टोलीले गोल गरेपछि खेल ३–३ गोलको रोमाञ्चक बराबरीमा सकिएको हो ।

ब्राजिलका लागि डेविन्हा, कप्तान मार्टा र लुडमिला डा सिल्भाले गोल गरिन् । डच टोलीका लागि भिभिएनी मिडेमाले दुई तथा डोमिनिक ब्लडवर्थले एक गोल गरिन् । मियागी स्टेडियममा शनिबार भएको खेलको तेस्रो मिनेटमा नै भिभिएनीको गोलबाट ब्राजिल पछि परेको थियो । तर १६औं मिनेटमा ब्राजिलका लागि डेविन्हाले बराबरी गोल फर्काइन ।

५९औं मिनटेमा भिभिएनीले व्यक्तिगत दोस्रो गोल गरेपछि डच टोलीले खेलमा पुनः २–१ को अग्रता लिन सफल भएको थियो । तर, डच टोलीको त्यो अग्रता लामो समय टिकेन । ६४औं मिनेटमा कप्तान मार्टाले पेनाल्टीमा गोल गर्दै खेललाई २–२ गोलको बराबरीमा ल्याइन् । ६८औं मिनेटमा लुडमिला डा सिल्भाले गोल गर्दै ब्राजिलाई खेलमा पहिलो पटक ३–२ को अग्रता दिलाए । ७९औं मिनेटमा डोमिनिक ब्लडवर्थले गोल गर्दै डच टोलीलाई हारबाट जोगाइन् ।

बराबरीपछि समूह ‘एफ’ मा नेदरल्यान्ड्स २ खेलबाट ४ अंक जोड्दै शीर्षस्थानमा यथावत रहेको छ । समान खेलबाटै समान ४ अंक नै रहेपनि ब्राजिल गोल अन्तरमा दोस्रो स्थानमा रहेको छ । समान १ अंक जोडेको चीन तेस्रो तथा जाम्विया पुछारमा छ ।

शनिबार नै चीन र जाम्वियाले ४–४ गोलको बराबरी खेलेका थिए । चीनका लागि सबै चार गोल सुआङ वाङले गर्दा जाम्वियाकी बारब्रा वान्डाले ह्याट्रिक तथा रचेल कुन्दानान्जीले एक गोल थपेकी थिइन् ।