एजेन्सी – टोकियो ओलम्पिक अन्तर्गत महिला फुटबलमा चीन र जाम्वियाले रोमाञ्चक बराबरी खेलेका छन् । ८ गोल भएको खेलमा चीन र जाम्वियाले ४–४ गोलको बराबरी खेल्दै अंक बाँडेका हुन् ।

मियागी स्टेडियममा शनिबार भएको खेलमा चीनका लागि सबै चार गोल सुआङ वाङले गर्दा जाम्वियाकी बारब्रा वान्डाले ह्याट्रिक तथा रचेल कुन्दानान्जीले एक गोल थपेकी थिइन् । गोलको वर्षा भएको खेलको छैटौ मिनेटमा सुआङ वाङले गोल गर्दै चीनलाई १–० को अग्रता दिलाइन् । १५औं मिनेटमा रचेल कुन्दानान्जीले गोल गर्दै खेललाई १–१ गोलको बराबरीमा ल्याइन् ।

त्यसपछि दुई मिनेटको अन्तर २२ र २३औं मिनेटमा सुआङ वाङले गोल गर्दै ह्याट्रिक पुरा गरेपछि चीन ३–१ ले अघि बढेको थियो । ४२औं मिनेटमा बारब्रा वान्डाले पेनाल्टीमा गोल गर्दै खेललाई पहिलो हाफमा ३–२ को अवस्थामा ल्याइन् ।

दोस्रो हाफ भने जाम्वियाको पक्षमा रह्यो । दोस्रो हाफको शुरुमै बारब्रा वान्डाले व्यक्तिगत दोस्रो गोल गर्दै खेललाई ३–३ गोलको बराबरीमा ल्याइन् । ६९औं मिनेटमा बारब्रा वान्डाले ह्याट्रिक पुरा गरेपछि खेलमा पहिलो पटक अग्रता लिएको जाम्विया ४–३ ले अघि बढ्यो ।

जारी ओलम्पिकमा उनको यो दोस्रो ह्याट्रिक हो । यसअघि उनले नेदरल्यान्ड्ससँग १०–३ ले पराजित भएको खेलमा ह्याट्रिक पुरा गरेकी थिइन् । ८३औं मिनेटमा सुआङ वाङले पेनाल्टीमार्फत व्यक्तिगत र टोलीको लागि चौथो गोल गर्दै चीनलाई हारबाट जोगाइन् ।

खेल सकिन ४ मिनेट बाँकी रहँदा क्विङटोङ लि सिधै रातो कार्ड खादै मैदानबाट बाहिरिएपछि चीन समस्यामा परेपनि बराबरीलाई जोगाउँदै समूहमा पहिलो अंक जोड्न सफल भयो ।

यो बराबरीसँगै समूह ‘एफ’ मा दुवै टोलीले समान दुई खेलबाट समान १ अंक जोडेका छन् । चीन पहिलो खेलमा ब्राजिलसँग ५–० ले तथा जाम्विया नेदरल्यान्ड्सँग १०-३ ले पराजित भएको थियो । उक्त खेलमा पनि वान्डाले ह्याट्रिक गरेकी थिइन् । गोल अन्तरमा चीन तेस्रो तथा जाम्विया पुछारमा छ । यो समूहको नेदरल्यान्ड्स र ब्राजिलबीचको खेल आज हुनेछ ।

यस्तै समूह ‘ई’ को खेलमा क्यानडाले चिलीलाई २–१ ले पराजित गरेको छ । क्यानडाले पहिलो जित दर्ता गर्दा चिलीले लगातार दोस्रो हार बेहोरेको हो । क्यानडाको जितमा जानिन बेक्कीले दुवै गोल गरिन् । चिलीकी कारिन एरायले एक गोल फर्काइन् ।