काठमाडौं (हाम्रो खेलकुद) – अफ्रिकी देश क्यामरुनको तीन खेलाडीलाई विदेशी कोटामा अनुबन्धन गर्दै ए डिभिजन क्लब ब्रिगेड ब्वाइज क्लबले ए डिभिजन लिग खेल्न टोली तयार रहेको जनाएको छ ।

नेपाल सुपर लिगमा चितवन एफसीका लागि खेलेका मिडफिल्डर रुडी बाकोपसँगै बर्टरान्ड एबोडे र फाब्रिस मर्लिन अथासीलाई टोलीमा समेट्दै बिबिसीले लिगका लागि २२ खेलाडी अनुबन्ध गरिसकेको जानकारी दियो । यसअघि बिबिसीसहित ललितपुरका ४ क्लबले एन्फालाई लिग तोकिएको समयबाट पछि सार्न आग्रह गरेका थिए । तर बिबिसीले उचित स्वास्थ्य मापदण्ड अपनाउँदै लिग आयोजना गर्न उक्त आग्रह गरिएको जनाएको छ ।

क्लबका अनुसार यसअघि तोकिएको असोज पहिलो साता लिग आयोजना गर्ने हो भने आवश्यक सम्पूर्ण स्वास्थ्य मापदण्डबारे एन्फाले सटिक जवाफ दिनुपर्ने बताएको छ । क्लबसँग एन्फाको बैठकमा सटिक जवाफ नआउने हुँदा क्लबको तयारीमा नै असर परेको पनि क्लबको भनाइ छ । एन्फाले खेलाडी, अफिसियल र टोलीसँग आबद्ध सबैलाई खोपको व्यवस्था गर्ने भनेपनि त्यसबारे कुनै कदम चालिएको छैन ।

युरोपमा लिग संचालन भइरहेको नजिर भएपनि त्यहाँको तुलनामा हाम्रो स्वास्थ्य सुविधाको अवस्था कस्तो छ भन्नेमा पनि ख्याल राख्न बिबिसीले एन्फालाई आग्रह गरेको छ । यसबाहेक लिगको खेल तालिकामा पनि क्लबले आपत्ति जनाएको छ । राष्ट्रिय लिग र ए डिभिजन लिग एकसाथ गर्ने प्रस्ताव केहि क्लबलाई मात्र फाइदा जनक हुने बताउँदै क्लबले यसबारे सोच्न एन्फालाई आग्रह गरेको छ ।

क्लबले लिगको बिचमा नै मोफसलको प्रतियोगिता आयोजना गर्नेबारे पनि असन्तुष्टि व्यक्त गरेको छ । लिग चल्दा नै मोफसलको प्रतियोगितामा सहभागी हुँदा चोटको सम्भावना बढ्ने हुनाले यसबारे सहि निर्णय लिन भनेको छ । क्लब र एन्फाबीच साउन १० गतेका लागि तोकिएको बैठकमा कुनै दुविधा बिना निर्णय लिएमात्र लिग सहज रुपमा खेल्न सकिने क्लबले जनाएको छ । यसका लागि क्लबले अन्य टोलीहरुको पनि आफ्नोबारे सोच्नु आवश्यक रहेको बताएको छ ।