काठमाडौं (हाम्रो खेलकुद)– नेपाल प्रहरी खेलकुद विकास समिति र खेल सामाग्री उत्पादक स्पेनिस कम्पनी केल्मीबीच प्रायोजन सम्झौता नविकरण भएको छ । यसअघि पुलिसको महिला र पुरुष फुटबल टोलीलाई मात्र प्रायोजन गर्दै आएको केल्मीले महिला र पुरुष भलिबल र महिला बास्केटबल टोलीलाई पनि प्रायोजन गरेको छ ।

प्रहरी खेलकुद समितिका तर्फबाट प्रतिष्ठानका कार्यकारी निर्देशक एवंम् नेपाल प्रहरी खेलकुद विकास समितिका सदस्य सचिव प्रहरी अतिरिक्त महानिरीक्षक प्रद्युम्नकुमार कार्की र नेपालका लागि केल्मीको आधिकारिक विक्रेता कामरु ट्रेडिङ प्रालीका प्रबन्ध निर्देशक प्रदीप न्यापानेले सम्झौता पत्रमा हस्ताक्षर गरेका थिए ।

सम्झौतामा प्रहरी खेलकुद समितिका प्रहरी उपरीक्षक हेमकुमार थापा र कामरुका प्रमुख कार्यकारी अधिकृत उत्तम न्यौपाने साक्षीका रुपमा रहेका थिए ।अहिलेको सम्झौता ४ वर्षको रहेको बताइएको छ । यसअघिको सम्झौता दुई वर्षको थियो । केल्मीले पुरुष, महिला फुटबल, भलिबल र महिला बास्केटबल टोलीका खेलाडीलार्य जर्सी सेट, मोजा र टि–सर्ट उपलब्ध गराउने छ । त्यस्तै सम्झौतामा पुलिस क्लबको पुरुष टोलीका एक खेलाडीलाई प्रत्येक वर्ष कुनै यूरोपियन फुटबल क्लबसँग अनुबन्धन प्रशिक्षणको व्यवस्था केल्मीले उपलब्ध गराउने पनि उल्लेख छ ।

प्रहरी खेलकुद समितिका सदस्य सचिव प्रहरी अतिरिक्त महानिरीक्षक कार्कीले नेपाल प्रहरीको खेलकुद क्षेत्रको विकास र विस्तारको लागि केल्मीसँग सहकार्य गर्न पाउँदा खुसी लागेको जनाउँदै केल्मीसँगको सहकार्यको निरन्तरताको आशा व्यक्त गरे । कामरुका प्रबन्ध निर्देशक न्यौपाने ज्यूले सहकार्यका लागि प्रहरी खेलकुद समितिलाई धन्यवाद दिदै समितिअन्तर्गत रहेका सबै १९ खेललाई भविष्यमा प्रायोजन गर्ने सम्भावना रहेको बताए । केल्मीले नेपाली राष्ट्रिय महिला तथा पुरुष टोलीलाई पनि प्रायोजन गर्दै आएको छ । केल्मीको देशभर १२ वटा आउटलेट रहेका छन् ।