एजेन्सी – टोकियो ओलम्पिक अन्तरगतको पुरुष फुटबलमा उपाधि दावेदारको रुपमा हेरिएको फ्रान्सको यु–२३ टोली मेक्सिकोसँग स्तब्ध बनेको छ ।

एजिनोमोटो स्टेडियम चोफु जापानमा बिहीबार भएको खेलमा फ्रान्स मेक्सिकोसँग ४–१ ले स्तब्ध बनेको हो । फ्रान्सलाई स्तब्ध पार्न मेक्सिकोका एर्नेस्टो भेगा, फ्रान्सिस्को कोर्डाेभा, कार्लाेस एन्टुना र इडुआर्डाे एगुएरेले समान एक गोल गरे । फ्रान्सका आन्द्रे पिएरे जिग्नाकले सान्त्वना गोल फर्काए ।

प्रतिस्पर्धात्मक पहिलो हाफ गोलरहित बराबरीमा सकिदा सबै ५ गोल दोस्रो हाफमा सम्भव भएको हो । ४७औं मिनेटमा एर्नेस्टो भेगाको गोलबाट मेक्सिकोले अग्रता लिएको थियो । ५५औं मिनेटमा फ्रान्सिस्को कोर्डाेभाले गोल गर्दै मेक्सिकोको अग्रता दोब्बर पारे । ६९औं मिनेटमा आन्द्रे पिएरे जिग्नाकले पेनाल्टीमा गोल गर्दै खेललाई २–१ को अवस्थामा ल्याए ।

८०औं मिनेटमा कार्लाेस एन्टुनाले गोल गरेपछि फ्रान्सको खेलमा फर्कने सम्भावना सकिएको थियो । इन्ज्युरी समयको थप गरिएको पहिलो मिनेटमा इडुआर्डाेले गोल गर्दै मेक्सिकोलाई ४–१ को सानदार जित दिलाए ।

यो जितपछि समूह ‘ए’ मा मेक्सिकोको ३ अंक पुगेको छ । फ्रान्स अंकविहीन हुदै पुछारमा छ । जापान र दक्षिण अफ्रिकाले केही बेरमा खेल्दैछ ।

यस्तै अर्काे खेलमा स्पेनको यु–२३ टोली आफ्नो पहिलो खेलमा इजिप्टको यु–२३ टोलीसँग गोलरहित बराबरी खेल्दै अंक बाँडेका छन् । बल पोसेसनमा बलियो पकड बनाएपनि फिनिसिङमा चुक्दा स्पेन बराबरीमा रोकिन बाध्य बन्यो ।

स्पेनले इजिप्टविरुद्ध मार्काे एसेन्सियो, पेड्री, ड्यानी ओल्मो, ड्यानी सेबालोस, पाउ टोरेस, एरिक गार्सिया, ओस्कार मिगुइजा र युनाइ सिमोनजस्ता स्टार खेलाडीलाई मैदानमा उतारेको थियो । यो बराबरीपछि समूह ‘सी’ मा स्पेन र इजिप्टको समान १ अंक पुगेको छ । यो समूहमा अर्जेन्टिना र अष्ट्रेलियाले केही बेरमा खेल्दैछ ।