एजेन्सी – टोकियो ओलम्पिक २०२० अन्तरगतको महिला फुटबलमा ब्राजिल र नेदरल्यान्ड्सले सानदार सुरुवात गरेका छन् । मियागी स्टेडियममा बुधबार भएको खेलमा ब्राजिलको महिला फुटबल टोलीले चीनमाथि ५–० को फराकिलो जित दर्ता गरेको छ ।

ब्राजिलको फराकिलो जितमा कप्तान मार्टाले दुई तथा डेविन्हा, एन्ड्रिसा आल्भेस र वियट्रिजले समान एक गोल गरिन् । पहिलो हाफमा दुई तथा दोस्रो हाफमा तीन गोल सम्भव भएको थियो । ३५ वर्षीय ब्राजिली मार्टा लगातार पाँचौ ओलम्पिकमा सहभागिता जनाउँदै गोल गर्ने पहिलो महिला खेलाडी बनिन् । यस्तै ब्राजिली फर्मिङ्गा सातौ ओलम्पिक खेल्ने पहिलो महिला खेलाडी बनिन् ।

यही समूह ‘एफ’ को अर्काे खेलमा नेदरल्यान्ड्सले जाम्वियामाथि १०–३ को फराकिलो जित दर्ता गरेको छ । पहिलो पटक ओलम्पिक खेलिरहेको नेदरल्यान्ड्सको जितमा भिभिएनी मिडेमाले ह्याट्रिकसहित ४ गोल गरिन् । लिके मार्टिनले दुई तथा सानिस भान डि सान्डेन, जिल रुड, लिनेथ विरेन्सटेन र भिक्टोरिया पेलोभाले समान एक गोल गरिन् । जाम्वियाका बारब्रा बान्डाले ह्याट्रिक पुरा गरेपनि फराकिलो हार टार्न सकेनन् ।

यस्तै समूह ‘ई’ को खेलमा इंग्ल्यान्डले चिलीलाई २–० ले पराजित गरेको छ । बेलायतको जितमा दुवै गोल एलेन ह्वाइटले गरिन् । जापान र क्यानडाले १–१ गोलको बराबरी खेल्दै अंक बाँडेका छन् । क्यानडाकी क्रिस्टिन सिन्क्लेइरले गोल गर्दा जापानकी माना इवाबुचीले बराबरी गोल फर्काइन् ।

समूह ‘जी’ मा स्वीडेनले बलियो अमेरिकालाई ३–० ले स्तब्ध पार्दा अष्ट्रेलियाले न्युजिल्यान्डलाई २–१ ले पराजित गर्दै विजयी सुरुवात गरेको छ । स्वीडेनको जितमा स्टिना ब्ल्याक्सटेनियसले २ तथा लिना हुर्टिगले एक गोल गरिन् । अष्ट्रेलियाकी तामेका यालोप र समान्थ केरले गोल गर्दा न्युजिल्यान्डकी गाब्रिल्ली रेन्नीले एक गोल फर्काइन् ।