एजेन्सी – आज (आइतबार) राति युरोपेली च्याम्पियनसिपको १६औं संस्करणको फाइनलमा इटाली र इंग्ल्यान्डले प्रतिस्पर्धा गर्दैछ । खेल वेम्वली स्टेडियम लन्डमा नेपाली समयअनुसार राति १२:४५ बजे हुनेछ ।

इटाली युरोमा दोस्रोपटक च्याम्पियन बन्न चाहन्छ भने इंग्ल्यान्ड पहिलो उपाधिको खोजीमा हुनेछ । खेल हुने समय नजिकिदै गर्दा उत्साह पनि बढ्दो छ । हामीले यहाँ अघिल्लो १५औं संस्करणको फाइनलको केही रोमाञ्चक तथ्य केलाउने प्रयास गरेका छौं ।

एडर (युरो २०१६) अतिरिक्त समयमा गोल

अनपेक्षित रुपमा फाइनलको यात्रा तय गरेको पोर्चुगलले अनुभवी र युवा खेलाडीको समिश्रण रहेको बलियो घरेलु टोली फ्रान्ससँग फाइनल भेट तय गरेको थियो । टोलीका स्टार तथा कप्तान क्रिस्टियानो रोनाल्डो घाइते भएर खेल्न नसक्ने भएपछि २७औं मिनेटमा नै मैदानबाट बाहिरिंदा पोर्चुगललाई दवाव बढेको थियो ।

तर ७९औं मिनेटमा रेनाटो साञ्चेजको स्थानमा मैदान छिरेका एडरले अतिरिक्त समय (१०९) औं मिनेटमा गोल गर्दै पोर्चुगललाई पहिलोपटक युरोको च्याम्पियन बनाएका थिए । उक्त गोल एडरको अन्तर्राष्ट्रिय करिअरको एकमात्र गोल पनि हो ।

पाँच संस्करणको फाइनलमा २–१ को जित

युरोको १५ मध्ये पाँच सस्करणको फाइनलमा २–१ को नजिता निस्किएको छ । १९६०, १९६४, १९८०, १९९६ र २००० मा २–१ को स्कोर निस्किएको हो ।

स्पेन लगातार दुई संस्करण जित्ने एक्लो टोली

स्पेनलाई युरोमा सदाबहार दावेदार टोलीको रुपमा लिइन्छ । तर, राम्रो खेल्दा खेल्दै पनि स्पेन उपाधिबाट बन्चित हुँदै आएको थियो । तर स्वर्णिम पुस्ताको स्पेनले २००८ र २०१२ मा लगातार युरोको उपाधि जित्न सफल भएको थियो । लगातार फाइनल जित्ने स्पेन एक्लो टोली हो ।

एकपटक ट्राइबेकरमा निर्णय

युरोको १५ संस्करणको फाइनलमध्ये एक संस्करणमा मात्रै ट्राइबेकरमा निर्णय भएको छ । सन् १९७६ को युरोमा चेकोस्लोभाकियाले पश्चिम जर्मनीलाई ट्राइबेकरमा ५–३ ले हराउँदै पहिलो उपाधि जितेको थियो । निर्धारित समयमा २–२ र अतिरिक्त समयमा यही नतिजा कायम रहेपछि खेल ट्राइबेकरमा धकेलिएको थियो ।

जर्मनी सबैभन्दा धेरै फाइनल खेल्ने टोली

जर्मनी युरोपेली च्याम्पियनसिपको फाइनलमा पुग्ने राष्ट्र हो । उसले ६ पटक फाइनलको यात्रा तय गर्दा तीन पटक उपाधि जितेको छ । जर्मनी सन् १९७२, १९७६, १९८०, १९९२, १९९६ र २००८ मा फाइनलमा पुग्दा १९७२, १९८० र १९९६ मा च्याम्पियन बनेको थियो । स्पेनले चारपटक फाइनलको यात्रा तय गर्दा तीन पटक उपाधि जितेको छ । सर्वाधिक युरो जित्ने कीर्तिमान जर्मनी र स्पेनकै नाममा छ । दुवैले समान ३ पटक युरो जितेका छन् ।

दुई संस्करणमा गोल्डेन गोलबाट निर्णय

सन् १९९६ र २००० मा अतिरिक्त समयमा गोल्डेन गोलबाट निर्णय लिइएको थियो । सन् १९९६ मा ओलिभर बिएरहोफले अतिरिक्त समय ९५औं मिनेटमा गोल गरेपछि जर्मनीले चेक रिपब्लिकलाई २–१ ले हराउँदै तेस्रोपटक युरोको च्याम्पियन बन्न सफल भएको थियो ।

त्यसको चार वर्षपछि डेभिड ट्रेजेग्वेटले अतिरिक्त समय (१०३) औं मिनेटमा गोल गरेपछि फ्रान्सले इटालीलाई २–१ हराउँदै च्याम्पियन बनेको थियो । अहिले भने गोल्डेन गोलको नियमलाई फिफाले नै हटाएको छ ।

भिलफोर्ट – युरो १९९२ को फाइनलको नायक

डेनमार्कले युरो १९९२ मा छनोट चरण पार गर्न सकेको थिएन । तर युगोस्लाभियालाई कारवाही भएपछि डेनमार्कले मौका पाएको थियो । त्यही मौको फाइदा डेनमार्कले अविश्वसनीयन रुपमा उठाउँदै च्याम्पियन बन्न सफल भएको थियो ।

टोलीका महत्वपुर्ण सदस्य किम भिलफोर्टले आफ्नो छोरीको उपचारका लागि दुई पटक टोलीको क्याम्प छाडेका थिए । तर, उनले जर्मनीविरुद्धका फाइनलमा गोल गर्दै डेनमार्कको २–० को जित सुनिश्चित गरेका थिए ।

डेब्युमै तीन टोली च्याम्पियन

तीन राष्ट्र (सोभियत युनियन, इटाली र पश्चिम जर्मनी) युरोको डेब्युमै च्याम्पियन बन्न सफल टोली हुन् । सोभियत युनियनले सन् १९६०, इटालीले १९६८ र पश्चिम जर्मनीले १९७२ मा उपाधि जितेका थिए ।

बेर्टी भोग्ट्स – प्रशिक्षक र खेलाडीको रुपमा विजेता

पश्चिम जर्मनीका बेर्टी भोग्ट्सले युरोमा खेलाडी र प्रशिक्षकको रुपमा उपाधि जित्न सफल भएका छन् । सन् १९७२ मा खेलाडीको रुपमा उपाधि जितेका बेर्टीले १९९६ मा प्रशिक्षकको रुपमा उपाधि जितेका थिए ।

स्पेनविरुद्ध इटाली – फाइनलमा सबैभन्दा फराकिलो जित

स्पेन निकै लयमा रहेको समय २००८ देखि २०१२ सम्म हो । यो समयमा स्पेनले तीन उपाधि दुई युरो र एक विश्वकप जित्न सफल भएको थियो । युरो २००८ र विश्वकप २०१० को च्याम्पियन बनेको स्पेनले २०१२ को युरोको फाइनलमा इटालीलाई ४–० ले हराउँदै उपाधि जितेको थियो । जुन युरोको फाइनलमा फराकिलो जित हो ।

एकै वर्ष युरो र च्याम्पियन्स लिग जित्ने खेलाडी

९ खेलाडीले एकै वर्ष च्याम्पियन्स लिग र युरो जित्न सफल भएका छन् । लुइस सुआरेज (इन्टर मिलान र स्पेन –१९६४), रोनाल्डल कोम्यान (पीएसभी इन्डोभेन र नेदरल्यान्ड्स – १९८८), बारी भान एरले (पीएसभी इन्डोभेन र नेदरल्यान्ड्स – १९८८), हान्स भान ब्रिउक्लेन (पीएसभी इन्डोभेन र नेदरल्यान्ड्स – १९८८), जेराल्ड भानेनवर्ग (पीएसभी इन्डोभेन र नेदरल्यान्ड्स – १९८८), हुआन माटा (चेल्सी र स्पेन –२०१२), फर्नान्डो टोरेस (चेल्सी र स्पेन –२०१२), क्रिस्टियानो रोनाल्डो (रियल म्याड्रिड र पोर्चुगल –२०१६) र पेपे (रियल म्याड्रिड र पोर्चुगल –२०१६)

अभागी बालक र ग्रिजमन

दुई खेलाडी माइकल बालक र एन्टोइन ग्रिजमन एक वर्षमा च्याम्पियन्स लिग र युरो जित्न असफल खेलाडी हुन् । माइकल बालकले २००८ मा जर्मनीबाट युरो र सोही वर्ष चेल्सीबाट च्याम्पियन्स लिगको उपाधि गुमाएका थिए । यस्तै फ्रान्सका एन्टोइन ग्रिजमनले २०१६ मा युरोको फाइनल र एट्लेटिको म्याड्रिडबाट च्याम्पियन्स लिगको उपाधि गुमाएका थिए ।

फर्नान्डो टोरेसलाई गोल्डेन बुट

स्पेनका फर्नान्डो टोरेसले सन् २०१२ को युरोको गोल्डेन बुट जित्न सफल भएका थिए । समान ३ गोल (एलान जागोइभ, मारियो म्यान्जुकिक, मारियो गोमेज, मारियो बालोटेली र क्रिस्टियानो रोनाल्डो) रहेपनि असिस्ट र थोरै समय १८९ मिनेट खेलेका कारण उनलाई यो अवार्ड प्रदान गरिएको हो ।