काठमाडौं (हाम्रो खेलकुद) – डेढ महिना अघि सम्पन्न नेपाल सुपर लिग (एनएसएल) मा काठमाडौं रजर्सलाई उपाधि दिलाउन महत्त्वपूर्ण भूमिका खेलेका दुई अफ्रिकी खेलाडीले न्यूरोड टिम (एनआरटी) बाट सहिद स्मारक ए डिभिजन लिग खेल्ने भएका छन् ।

एनएसएलका उत्कृष्ट मिडफिल्डर समेत चुनिएका मेसुके ओलुमोउ र स्टेफन समिरसँग आन्तरिक सम्झौता गरेको एनआरटीले शनिबार पत्रकार सम्मेलनमार्फत जानकारी दियो । यसपटकको लिग असोज ३ बाट सुरु गर्ने अखिल नेपाल फुटबल संघ (एन्फा) ले यसअघि नै घोषणा गरिसकेको छ । ८ दशक भन्दा लामो इतिहास रहेको एनआरटीले ४ पटक ए डिभिजन लिगको उपाधि जितेको छ ।

विगतमा क्लबले उतार चढाव भोगेको स्मरण गर्दै एनआरटीका अध्यक्ष सुन्दर नरसिंह जोशीले भने, ‘विगतका अनुभवबाट पाठ सिक्दै आर्थिक रुपमा सम्पन्न गराउने र नेपाली फुटबललाई माथि उठाउने अभियानका रुपमा लिगलाई लिएका छौं ।’

एनआरटीलाई राजुकाजी शाक्यले प्रशिक्षण दिनेछन् । एनएसएलको प्रदर्शनकै आधारमा दुई अफ्रिकी खेलाडीलाई अनुबन्धन गरेको जानकारी दिए । लिगमा ४ विदेशी खेलाडी राख्न पाउने प्रावधान अनुसार दुई खेलाडी अहिले भित्राएको हो । मेसुकेले एनएसएलमा सर्वाधिक ८ गोल गरेका थिए । उनले त्यसअघि ए डिभिजनमा संकटाबाट खेलेका थिए । स्टेफनले भने हिमालयन शेर्पाबाट खेलिसकेका छन् ।

क्लबमा १२ खेलाडी पुरानै रहने र अन्य खेलाडीसँग पनि सम्झौताको प्रक्रिया अघि बढेको क्लबले पत्रकार सम्मेलनमा जानकारी दियो । सन् १९३४ मा स्थापना भएको एनआरटीले यसपटकको लिगका लागि १ करोड ६० लाख रुपैयाँ विनियोजन गरेको जनाएको छ ।