एजेन्सी – युरो २०२० अन्तर्गत तेस्रो क्वाटरफाइनलमा शनिबार चेक रिपब्लिक र डेनमार्क भिड्दैछन् । खेल नेपाली समयअनुसार रातको ९:४५ बजे अजरबैजानस्थित बाकु ओलम्पिक रंगशालामा हुनेछ ।

डेनमार्कले प्रतियोगिताको सुरुवाती दुई खेलमा हार बेहोरेपनि पछिल्लो दुई खेलमा भने उच्च प्रदर्शन गरेको छ । राउन्ड अफ १६ मा वेल्समाथि ४-० को जित हासिल गर्दै क्वाटरफाइनलमा स्थान बनाएको डेनमार्कले आक्रमण र डिफेन्स दुवैमा लगातार सुधार गरेको छ । वेल्सविरुद्ध खेलमा कास्पर डोलबर्गले दुई गोल गर्दै पहिलो सुरुवातमा नै प्रभाव जमाएका थिए ।

त्यस्तै चेक रिपब्लिकले पनि अन्तिम १६ को खेलमा नेदरल्यान्ड्सलाई स्तब्ध पार्दै क्वाटरफाइनलमा स्थान पक्का गर्यो । दोस्रो हाफमा डच डिफेन्डर म्याथिस डे लिग्टले रातो कार्ड पाएपछि चेकले दबाब बनाउँदै खेल जितेको थियो । चेकका प्रशिक्षक जारोस्लाभ सिल्हाभीले डेनमार्कको टिम स्पिरिट बलियो रहेकाले खेल सहज नहुने बताएका छन् ।

‘डेनमार्कको टिम स्पिरिट नै उनीहरुको बलियो पक्ष हो,’ विपक्षी टोलीको उत्कृष्ट खेलाडी को हो भन्ने प्रश्नमा सिल्हाभीले भने, ‘टिम स्पिरिट नै बलियो शक्ति हो । डेनिस टोलीमा सुपरस्टार छैनन्, तर उनीहरु एकतृत भएर बलियो प्रदर्शन गर्छन् । हाम्रो शैली पनि उनीहरुसँग मिल्दो जुल्दो छ ।’

डेनमार्कका लागि युसुफ पाउल्सेन चोटबाट ठिक हुँदै फर्किएका छन् । तर डोलबर्गले वेल्सविरुद्ध गरेको प्रदर्शन हेर्दा उनी नै सुरुवाती रोजाइमा खेल्ने देखिन्छ । मिडफिल्डर थोमस डिलेनी र कप्तान सिमोन केयरले बुधबार प्रशिक्षणमा भाग लिएका थिएनन् । तर दुवै यस खेलका लागि फिट रहने अनुमान छ ।

चेकका लागि पनि केहि सुखद खबर छ । चोटका कारण पछिल्लो खेल गुमाएका कप्तान भ्लादिमिर दारिदा टोलीमा फर्किएका छन् । डिफेन्डर जान बोरिल पनि एक खेलको प्रतिबन्धबाट टोलीमा आएका छन् ।

युरोमा चेक र डेनमार्कबीच यो तेस्रो भेट हो । यसअघि चेकले सन् २००० को समूह चरणमा २-० तथा २००४ को क्वाटरफाइनलमा ३-० को जित दर्ता गरेको थियो । अन्तर्राष्ट्रिय खेलमा भने यी दुईबीच पछिल्लो ६ मध्य ५ खेल बराबरीमा सकिएका छन् ।