एजेन्सी – एमिल फोर्सबर्गले अन्तिम समयमा गोल गरेपछि स्वीडेन र युक्रेनबीच जारि युरोपेली च्याम्पियनसिप २०२० अन्तर्गत राउन्ड अफ १६ को पहिलो हाफ १-१ को बराबरीमा सकिएको छ ।

स्वीडेनले खेलको सुरुवाती मिनेटदेखि नै आक्रमण बुन्दै दबाब कायम गरेपनि अग्रता लिन भने चुकेको थियो । एकपछि अर्को आक्रमणमा युक्रेनका डिफेन्स र गोलरक्षकले संयमित प्रदर्शन गरेपछि खेल बराबरीमा नै रहेको थियो । तर कप्तान यार्मालेन्कोको चलाखीपूर्ण मुभ युक्रेनले खेलको विपरित मोडमा अग्रता लियो । त्यसपछि पनि लगातार आक्रमण बुनेको स्वीडेनले पहिलो हाफको अन्त्यतिर फोर्सबर्गको गोलमा बराबरी गरेको थियो ।

१८ औं मिनेटमा डेजान कुलुसेभ्सकीको क्रसमा अनमार्क रहेका एमिल फोर्सबर्गले राम्रोसँग हेडर प्रहार गर्न नसक्दा युक्रेनको खतरा टरेको थियो । लगत्तै एलेक्जेन्डर इसाकले पेनाल्टी क्षेत्र भित्रबाट गरेको प्रहार गोलरक्षक बिट भएको अवस्थामा पोस्टभन्दा थोरैले बाहिरियो ।

खेलको २७ औं मिनेटमा युक्रेनले ओलेक्जान्दर जिन्चेन्कोको गोलमा अग्रता लियो । पेनाल्टी क्षेत्रको दायाँ भागबाट कप्तान आन्द्रे यार्मालेन्कोले आउटसाइड फुटबाट दिएको क्रसलाई बायाँ विंगबाट जिन्चेन्कोले गोल गरेका थिए । उनले पहिलो टचमा नै गरेको शक्तिशाली प्रहार गोलरक्षक रोबिन ओल्सनको हातमा लाग्दै गोल भएको थियो ।

२९ औं मिनेटमा स्वीडेनका कप्तान सबास्टियन लार्सनले चलाखीपूर्ण फ्रिकिक लिँदै सिधै गोलमा गरेको प्रहारलाई गोलरक्षक बुस्कानले मुस्किलले बचाए । ४२ औं मिनेटमा फोर्सबर्गले गोल गर्दै स्वीडेनलाई खेलमा फर्काए । उनले पेनाल्टी क्षेत्र बाहिरबाट गरेको प्रहार डिफेन्डरलाई डिफ्लेक्ट हुँदै गोलमा परिणत भएको थियो ।

यस खेलको विजेताले क्वाटरफाइनलमा इंग्ल्यान्डको सामना गर्नेछ । इंग्ल्यान्डले यसअघि भएको खेलमा जर्मनीलाई २-० ले पराजित गरेको थियो ।