एजेन्सी – इटालियन क्लब युभेन्टस तथा नेदरल्यान्ड्सको राष्ट्रिय फुटबल टोलीका डिफेन्डर म्याथिस डी लिग्टले आफ्नै कारणले गर्दा नेदरल्यान्ड्स युरोपेली च्याम्पियनसिप २०२० को राउन्ड अफ १६ मा चेक रिपब्लिकसँग पराजित भएको बताएका छन् ।

डी लिग्टले खेलको ५५ औं मिनेटमा रातो कार्ड खाएपछि नेदरल्यान्ड्स १० खेलाडीमा समेटिएको थियो । उनले हातले बल रोकेपछि भिडियो असिस्टेन्ट रेफ्रीको सहायता लिँदै रेफ्रीले रातो कार्ड दिएका थिए । उनले पेनाल्टी क्षेत्र बाहिर लडेपछि सिकलाई बलसम्म पुग्न नदिने प्रयास गर्दा हातले बल रोकेका थिए ।

खेलको पहिलो हाफमा केहि अवसर सिर्जना गरेको नेदरल्यान्ड्सले खेलमा पोसेसन राख्दै दबाब पनि बनाएको थियो । तर डी लिग्टले रातो कार्ड खाएपछि चेकले दबाब बनाएको थियो । चेकका लागि टोमस होलेसले ६८ औं मिनेट र प्याट्रिक सिकले ८० औं मिनेटमा गोल गर्दै जित पक्का गरे ।

खेलपछि बोल्दै डी लिग्टले आफ्नो गल्तीका कारण टोलीले हार बेहोरेको बताए । ‘पक्कैपनि निकै नराम्रो लागेको छ । हामीले खेल हार्नुको मुख्य कारण नै मैले गरेको गल्ति हो । अहिले फर्केर हेर्दा मैले त्यो बललाई बाउन्स हुन नै नदिनुपर्ने थियो जस्तो लाग्छ,’ उनले भने ।

पहिलो हाफमा अवसर सिर्जना गरेको बताउँदै उनले रातो कार्डले नै खेल बदलिएको बताए । ‘मलाई लाग्छ खेल हाम्रो नियन्त्रणमा नै थियो । हामीले पहिलो हाफमा केहि अवसर पनि सिर्जना गरेका थियौं । मलाई लाग्दैन उनीहरुले त्यस्तो राम्रो अवसरहरु बनाएका थिए । तर रेड कार्डले खेलको रुप नै बदलियो,’ उनले थपे ।

यो पनि : नेदरल्यान्ड्सलाई स्तब्ध पार्दै चेक क्वाटरफाइनलमा