एजेन्सी – बेल्जियम राष्ट्रिय फुटबल टोलीका प्रशिक्षक रोबर्टो मार्टिनेजले पोर्चुगलविरुद्ध युरो २०२० अन्तर्गत राउन्ड अफ १६ को खेलअघि विपक्षी कप्तानका लागि कुनै विशेष योजना नरहेको बताएका छन् ।

रोनाल्डोले जारी युरोको समूह चरणमा सबै तीन खेलमा गोल गरेका छन् । प्रतियोगितामा ५ गोल गर्दै सर्वाधिक गोलकर्ताको सुचिमा अग्रस्थानमा रहेका रोनाल्डोले अन्तर्राष्ट्रिय फुटबलमा सर्वाधिक गोल गर्ने इरानका अली दाइको कीर्तिमान पनि बराबरी गरेका छन् । ग्रुप अफ डेथमा रहेको पोर्चुगलले समूह चरणको ३ खेलमा ७ गोल गरेको थियो ।

प्रशिक्षक मार्टिनेज भने रोनाल्डोका लागि कुनै विशेष योजना नबनाएको बताउँछन् । ‘जब हामीले कुनै एक खेलाडीलाई लक्षित गरेर योजना बनाउँछौं, अन्य खेलाडीले थप समस्या दिने सम्भावना हुन्छ,’ उनले भने, ‘पोर्चुगलले खेल्ने शैली हेर्दा आक्रमणमा निकै बलियो देखिन्छ । उनीहरुको गति रोक्न कठिन नै हुन्छ ।’

‘अहिलेको अवस्थामा रोनाल्डोले जे गर्दापनि सहि निर्णय सावित भएको छ । उनको पास सहि हुन्छ, अवसरमा गरेको प्रयास गोल भएको छ र यस्तो खेलाडीसँग सतर्क हुन जरुरि छ । यसो भनिरहँदा पोर्चुगलका अन्य खेलाडीमा पनि हामीले उत्तिकै ध्यान दिनुपर्छ,’ प्रशिक्षक मार्टिनेजले भने ।

‘हामीले एकतृत भएर पोर्चुगलको आक्रमण निस्तेज पार्नुपर्छ । हामीले विपक्षीको बारेमा सक्दो जानकारी लिने प्रयास गरेका छौं । अहिले हामी पनि राम्रो लयमा छौं र यसैलाई निरन्तरता दिने प्रयास गर्नेछौं,’ उनले प्रष्ट पारे ।

मिडफिल्डर केभिन डे ब्रुएनको आगमनले पनि टोलीमा उत्साह थपिएको प्रशिक्षक मार्टिनेजले बताए । ‘पहिलो खेलमा ४५ मिनेट र त्यसपछि झन्डै ९० मिनेट, केभिन टोलीमा फर्केको देख्दा निकै खुसी लागेको छ । अबको खेलका लागि उनी शारीरिक रुपमा तयार छन् जस्तो लाग्छ,’ उनले भने ।

‘केभिन नियमित भूमिकामा नै देखिनेछन् । उनलाई कुनै सटिक पोजिसन दिएर जिम्मेवारी दिनु पर्दैन । उनलाई अवसर हुँदा प्लेमेकरको भूमिका र आक्रमणमा पनि सहयोग गर्न सक्छन्,’ उनले थपे, ‘हामीले धैर्य गरेर आफ्नो योजना अनुसार खेल्नुपर्छ । पोर्चुगल रक्षात्मक रुपमा बलियो छ र हामी आफ्नो नियमित योजनामा खेल्नेछौं ।’

यो पनि : बेल्जियमसामु पोर्चुगलको अग्निपरीक्षा