एजेन्सी – युरोपका ११ शहरमा जारी १६औं संस्करणको युरोपेली च्याम्पियनसिपमा १ सय गोलको आँकडा पुरा भएको छ । प्रि–क्वाटरफाइनलमा इटालीका म्याटियो पेस्सिनाले अष्ट्रियाविरुद्ध अतिरिक्त समयमा गोल गरेपछि युरोमा १ सय गोलको आँकडा पुरा भएको हो ।

सब्सिच्युट पेस्सिना ६७औं मिनेटमा निकोलो बरेल्लाको स्थानमा मैदान प्रवेश गरेका थिए । युरोको ३८औं खेलमा सय गोल पुरा भएको हो । समूह चरणको ३६ खेलमा ९४ गोल निस्किएको थियो । अष्ट्रियाका सासा कालाज्डिचले इटालीविरुद्ध एक गोल गर्दा युरोमा गोलसङ्ख्या १ सय १ पुगेको छ । उक्त खेलमा इटालीले २–१ को जित दर्ता गर्दै क्वाटरफाइनलमा स्थान बनाउन सफल भएको छ ।

युरोमा पहिलो गोल टर्कीका मेरिह डेमिरलले इटालीविरुद्धको उद्घाटन खेलमा गोल गरेका थिए । बराबरीतर्फ रहेको खेलमा उनकै गोलबाट इटालीले अग्रता लिएको थियो । उक्त खेल इटालीले ३–० ले सहजै जितेको थियो ।

युरोमा १ सय गोल पार हुदै ह्याट्रिक निस्कन सकेको छैन । एक खेलमा पोर्चुगलका कप्तान क्रिस्टियानो रोनाल्डोले दुई गोल गरेपनि ह्याट्रिक निस्कन सकेको छैन । बेल्जियमका रोमेलु लुकाकु, चेकका प्याट्रिक सिक, इटालीका म्यानुयल लोकाटेली, स्वीट्जरल्यान्डका जद्रान शाकिरी, नेदरल्यान्ड्सका जर्जिन्हो वाइनाल्डम, स्वीडेनका इमिल फोर्सवर्ग, पोल्यान्डका रोबर्ट लेवान्डोस्की, फ्रान्सका करिम बेन्जेमा र डेनमार्कका कास्पर डोल्सवर्गले एकै खेलमा समान दुई गोल गरेका छन् ।

युरोमा पोर्चुगल र जर्मनीबीच सबैभन्दा धेरै ६ गोल भएको छ । उक्त खेलमा जर्मनीले ४–२ को जित निकालेको थियो । यस्तै युरोमा स्पेनले स्लोभाकियामाथि निकालेको ५–० जित सबैभन्दा फराकिलो जित हो । युरोको समूह चरणमा ८ खेल बराबरीमा टुंगिदा २८ खेलमा जित र हारको नतिजा निस्किएको थियो ।

युरोमा पोर्चुगिज कप्तान रोनाल्डो ५ गोलसहित सर्वाधिक गोलकर्ताको सुचीमा शीर्षस्थानमा रहेका छन् । उनलाई जर्जिन्हो वाइनाल्डम, रोबर्ट लेवान्डोस्की, रोमेलु लुकाकु, इमिल फोर्सवर्ग र प्याट्रिक सिकले समान ३ गोलसहित पछ्याइरहेका छन् ।