काठमाडौं (हाम्रो खेलकुद) – एन्फाका केन्द्रीय सदस्य रुपेश अधिकारीले जेठमा सम्पन्न खुकुरी नेपाल सुपर लिग (एनएसएल) अन्तर्गत एफसी चितवनले व्यवस्थापकको जिम्मेवारी निर्वाह गरेका थिए ।

अधिकारीले जिम्मेवारी सम्हाल्ने क्रममा नै आफूले पारिश्रमिक वापत प्राप्त गर्ने सम्पूर्ण रकम चोटग्रस्त ३ महिला खेलाडीलाई सहयोग गर्ने घोषणा गरेका थिए । चोटका कारण मैदानबाहिर रहेका राष्ट्रिय टोलीका फरवार्ड सावित्रा भण्डारी र हिरा भुजेलसँगै नेपाल यू१९ राष्ट्रिय टोलीकी सदस्य समिक्षा घिमिरेलाई सहयोग गर्ने बताएका थिए ।

उपचारका लागि शनिबार कतार जाने क्रममा रहेकी सावित्रालाई अधिकारीको तर्फबाट उनका भाइले शुक्रबार रकम हस्तान्तरण गरेका थिए । शल्यक्रियापछि फिजियो गराइरहेका हिरा र समिक्षालाई पनि सोहि अवसरमा रकम हस्तान्तरण गरिएको हो ।

कोरोनाको दोस्रो लहरका कारण भएको निषेधाज्ञाका कारण रकम हस्तान्तरणमा केहि ढलाई भएको जनाउँदै अधिकारीले भने, ‘म उपत्यका बाहिर छु । भाईमार्फत रकम हस्तान्तरण गरेका छौं । खेलाडीको साथमा हामी सधै रहन्छ भन्ने सन्देश दिन चाहन्छौं । अरुलाई पनि यसबाट प्रेरणा मिल्यो भने त्यो खुसीको विषय हुनेछ ।’

स्पार्क फिजियोथेरापी हस्पिटलका अध्यक्ष समेत रहेका अधिकारीले आफ्नो संस्थामार्फत पनि प्रत्यक्ष र अप्रत्यक्ष रुपमा खेलाडीहरुलाई सहयोग गर्दै आएका छन् । विगतमा पनि फुटबल खेलाडीहरुलाई आफ्नो तर्फबाट सक्दो सहयोग गरेको स्मरण गर्दै अधिकारीले भविष्यमा पनि सहयोगलाई जारी राख्ने बताएका छन् ।

एन्फाको पहलमा सावित्रा कतारमा शल्यक्रियाका लागि जाँदैछिन् । गत फागुन ३ गते राष्ट्रिय महिला लिग खेल्ने क्रममा सावित्राको दायाँ घुँडामा चोट लागेको थियो । हिरा र समिक्षाको ग्वार्कोस्थित बिएण्डबीमा शल्यक्रिया भएको थियो ।