एजेन्सी – स्पेनिस राष्ट्रिय फुटबल टोलीका फरवार्ड अल्भारो मोराटाले युरोपेली च्याम्पियनसिप २०२० को दौरान गरेको प्रदर्शनलाई लिएर उनको परिवारलाई धम्की आइरहेको खुलासा गरेका छन् ।

इटालियन क्लब युभेन्टसबाट व्यावसायिक फुटबल खेलिरहेका २८ वर्षीय फरवार्डले सामाजिक संजालमा आफ्नो परिवारलाई धम्की आएको बताए । उनले स्पेनको सेभियामा रहँदै आएका पत्नी र बच्चालाई पनि दुर्व्यवहार भएको बताएका छन् । मोराटाले समूह चरण अन्तर्गत पोल्यान्डविरुद्ध खेलमा कमजोर प्रदर्शन गर्दा स्पेन बराबरीमा रोकिएको थियो ।

‘ मलाई ‘तिम्रो बच्चा नरहोस्’ भन्ने सन्देश आउँछ । म यस्ता सबै मान्छेलाई मेरो स्थानमा रहेर सोच्न आघ गर्दछु । आफ्नो परिवारलाई धम्की आउँदा कस्तो महसुस हुन्छ सोचेर हेर्दा हुनेछ,’ मोराटाले स्पेनिस रेडियो क्याडेना कप स्टेसनलाई भने ।

‘मेरो श्रीमती र बच्चा मोराटा लेखिएको जर्सी लगाएर रंगशालामा थिए । समर्थकहरुले लगातार उनीहरुलाई अपशब्द प्रयोग गरे,’ उनले भने, ‘यो निकै कठिन समय हो । खेल दौरान मेरो प्रदर्शन लिएर मेरो आलोचना गर्नुलाई बुझ्न सकिन्छ । त्यसको पनि एक सीमा हुन्छ ।’

मोराटाले गत सिजन एटलेटिको म्याड्रिडबाट लोनमा रहेर युभेन्टसबाट खेलेका थिए । उनले बुधबार स्लोभाकियाविरुद्ध खेलमा पनि स्पेनले ५-० ले जित्दा पेनाल्टीमा गोल गर्न सकेका थिएनन् । पोल्यान्डविरुद्ध १-१ र स्वीडेनविरुद्ध गोलरहित बराबरीमा पनि उनले राम्रो प्रदर्शन गर्न सकेका थिएनन् । पोल्यान्डविरुद्ध एकमात्र गोल गरेपनि उनले मोरेनोको पेनाल्टीमा आएको रिबाउन्डमा गोल गर्न सकेका थिएनन् ।

मोराटाले स्लोभाकियाविरुद्ध खेलमा पेनाल्टीमा गोल गर्नबाट चुकेपछि रातभर निन्द्रा नपरेको बताए । उनले आफैं पेनाल्टी लिने निर्णयलाई लिएर भने कुनै विस्मात नरहेको बताए ।

‘म पेनाल्टी लिन अघि बढेकोमा गौरव गर्छु । मलाई वार्मअपकै दौरान समर्थकले गिज्याएका थिए । केहि वर्ष अघि म दुखि हुन्थे तर अहिले भने म प्रेरित हुन्छु । मलाई गलत सोच्नेले मलाई राम्रोसँग चिनेको छैनन्,’ उनले भने ।

‘ यस्तो कठिन समयमा अहिले जस्तो राम्रो वातावरण पाउन कठिन हुन्छ । यो समयमा पनि मेरो वरपर रहेका सबैले मेरो ख्या राख्छन् । म जसको पनि आँखामा हेर्छु, मेरो साथमा रहेको पाउँछु,’ मोराटाले थपे ।

स्पेनले अब अन्तिम १६ मा क्रोएसियाको सामना गर्दैछ । मोराटाले प्रतियोगितामा कमजोर सुरुवात गरेपनि टोली एकतृत हुँदै अघि बढ्नेबारे सोचिरहेको बताए ।

यो पनि : युरो २०२० : जो समूह चरणमा चम्किए