लुका मोड्रीच उमेरले ३५ वर्षका भए । राष्ट्रिय टोलीबाट खेल्न थालेको डेढ दशक भइसकेका उनले विश्व फुटबलमा आफूलाई सिद्ध पार्न सायदै केहि बाँकी होला । क्लब स्तरमा रियल म्याड्रिडबाट प्रचुर सफलता हासिल गरेका मिडफिल्डर क्रोएसियालाई आधुनिक फुटबलमा बेग्लै चिनारी दिने प्रयासमा छन् ।

मंगलबार युरोपेली च्याम्पियनसिप अन्तर्गत समूह चरणको अन्तिम खेलमा यिनै मोड्रीच क्रोएसियाका लागि निर्णायक बने । मिडफिल्डमा रहेर टोलीको खेललाई मोड्ने यिनले मंगलबार नतिजा नै मोडे । दोस्रो हाफमा बराबरीमा चलिरहेको खेलमा उनकै दर्शनीय गोलमा क्रोएसियाले अग्रता लियो । त्यसपछि उनकै कर्नरमा इभान पेरिसिचले गोल गर्दै अन्तिम १६ मा टोलीको स्थान पक्का गरे ।

मोड्रीचले गरेको गोलको महत्त्व क्रोएसियाले राम्रोसँग बुझेको छ । त्यो गोल नहुँदो हो त क्रोएसिया समूह चरणबाट नै घर फर्किएको हुन्थ्यो । जसरि रसियामा भएको विश्वकपमा मोड्रीचले टोलीलाई फाइनलसम्म पुर्याए, युरोमा पनि उनले त्यस्तै लय देखाएका छन् । त्यस वर्ष ब्यालोन डी’ओर जितेका मोड्रीच अहिले पनि उस्तै लयमा छन् ।

रियल म्याड्रिडले ३५ वर्षीय मिडफिल्डरलाई एक वर्षको सम्झौता नविकरण गर्नुले पनि उनी कस्तो खेलिरहेका छन् भन्ने स्पष्ट पार्छ । रियल त्यहि क्लब हो जसले १६ वर्ष क्लब बिताएका र पछिल्लो पाँच वर्ष टोलीका कप्तान रहेका सर्जियो रामोसलाई भने त्यो विकल्प पनि दिएन ।

मोड्रीचका लागि स्कटल्यान्ड तयार थियो । तर उनले जुन किसिमको गोल गरे, स्कटल्यान्डका गोलरक्षक डेविड मार्शल निरिह बने । उनले मोड्रीचको प्रहारमा डाइभ त दिएका थिए । तर मोड्रीचले आउटसाइड फुटले गरेको प्रहारको शक्ति र दिशा यति सटिक थियो, मार्शल उक्त गोलका लागि नजिकका दर्शक मात्र बने ।

मोड्रीचको नाममा क्रोएसियाको फुटबल इतिहास पल्टाउने हो भने धेरै अध्याय लेखिनेछन् । करिअरको अन्त्यतिर आउंदै गर्दा पाना अझ थपिने क्रममा छन् । मार्चमा क्रोएसियाका लागि सर्वाधिक खेल खेल्ने खेलाडी बनेका मिडफिल्डरले हालसम्म १ सय ४१ खेल खेलेका छन् । युरोमा गोल गर्दै उनी क्रोएसियाका लागि सर्वाधिक कान्छा थिए, र मंगलबार सबैभन्दा बढी उमेरका गोल गर्ने खेलाडी पनि बने ।

सन् २०१८ विश्वकप पछि मारियो मान्जुकिच, ड्यानीएल सुबासिच र इभान राकिटिचले सन्न्यासको घोषणा गरे । क्रोएसियाको एक युगको नै पूर्णविराम थियो यो । यी तीनै खेलाडी मोड्रीचभन्दा कम उमेरका छन् । मोड्रीच भने अझैपनि देशको लागि योगदान दिन सक्नेमा विश्वस्त थिए, र त्यसै अनुसार खेलिरहेका पनि छन् ।

स्कटल्यान्डविरुद्ध मोड्रीचले आफू अझै किन मैदानमा छु भन्ने प्रष्ट पारे । उनले खेल अवधिभर १ सय १५ पटक बल छोए, अन्य खेलाडीभन्दा १६ पटक बढी । उनले दिएको ९८ पासमध्य दुई तिहाइ पास विपक्षी हाफमा थियो । स्कटल्यान्डका कप्तान एन्डी रोबर्टसनले खेलपछि भने, ‘मोड्रीचले पूरा खेल चलाए र सानदार गोल गरे – हामी त्यसैले पछि पर्यौं ।’