एजेन्सी – नर्थ म्यासेडोनियाका भेट्रान कप्तान गोरान पाण्डेभले अन्तर्राष्ट्रिय फुटबलबाट सन्न्यास लिएका छन् । ३७ वर्षीउय पाण्डेभले युरोपेली च्याम्पियनसिपमा नेदरल्यान्ड्ससँगको खेलपछि अन्तर्राष्ट्रिय फुटबलबाट सन्न्यास लिएका हुन् ।

उनको अन्तिम खेलमा दुवै टोलीका खेलाडीसँगै दुवै टोलीमा समर्थकहरुले आफ्नो ठाउँबाट ‘स्ट्यान्डिङ ओभिएसन’ दिएका थिए । उनको कप्तानीमा टोलीले पहिलोपटक युरोपेली च्याम्पियनसिप खेल्दा समूह चरणको तीन खेलमा नै हार बेहोर्दै च्याम्पियनसिपबाट बाहिरिएको छ । उनको अन्तिम खेलमा नर्थ म्यासेडोनिया डच टोलीसाग ३–० ले पराजित हुन पुग्यो ।

नर्थ म्यासेडोनियाले पहिलो खेलमा अष्ट्रियासँग ३–१ ले तथा युक्रेनसँग २–१ ले पराजित भएको थियो । टोलीले ठुलो प्रतियोगितामा ८ गोल खादा २ गोल गर्न सफल भयो । कप्तान गोरान पाण्डेभ नर्थ म्यासेडोनियाबाट ठुलो प्रतियोगितामा गोल गर्ने पहिलो खेलाडी बने । उनले अष्ट्रियाविरुद्ध एक गोल गरेका थिए । उनी युरोपियन च्याम्पियनसिपमा गोल गर्ने सर्वाधिक उमेरका दोस्रो भेट्रान खेलाडी बने । उनीभन्दा अघि इभिका भास्टिक रहेका छन् ।

इटालियन सिरी ‘ए’ क्लब जिनोआका फरवार्ड पाण्डेभले ६ जुन २००१ मा विश्वकप छनोटमा टर्कीविरुद्धको खेलबाट सिनियर टोलीमा डेब्यु गरेका थिए । उनले २००१ देखि २०२१ सम्म अर्थात दुई दशक नर्थ म्यासेडोनियाबाट १२२ खेल खेल्दै ३८ अन्तर्राष्ट्रिय गोल गरेका छन् । उनले गत वर्ष नै सन्न्यास लिने तयारी गरेपनि कोरोनाका कारण युरो एक वर्ष पछि सरेपछि उनको सन्न्यास थाती रहेको थियो ।