एजेन्सी – युरोपेली च्याम्पियनसिपको समूह चरणको तेस्रो तथा अन्तिम राउन्डको खेल आजदेखि शुरु हुदैछ । तेस्रो राउन्डको पहिलो दिन समूह ‘ए’ को दुवै खेल एकै समयमा हुनेछ ।

स्वीट्जरल्यान्ड र टर्कीबीचको खेल अजरबैजानको बाकुमा हुदा इटालीले घरेलु मैदानमा वेल्सको सामना गर्नेछ । दुवै खेल नेपाली समयअनुसार एकै समय राति ९:४५ बजे हुनेछ ।

स्वीट्जरल्यान्डलाई शीर्ष २ मा रहँदै अन्तिम १६ मा पुग्न आफुले जितेर मात्रै पुग्दैन अर्काे खेलमा वेल्सले पनि हार्नुपर्नेछ । यसमा गोल अन्तरले पनि फरक पार्नेछ । पराजित भएको खण्डमा भने स्वीट्जरल्यान्ड समूह चरणबाटै बाहिरिनेछ । वेल्सले पनि जित र स्वीस टोली पनि विजयी भएको खण्डमा स्वीस टोली उत्कृष्ट तेस्रो टोलीको रुपमा अघि बढ्ने सम्भावना रहन्छ ।

दुवै टिमले निश्चित जितका लागि खेल्नेछन् । बराबरीमा दुवै टिमलाई केही फाइदा हुने छैन । जहाँसम्म जित रहेको छ, त्यो पनि बढी गोल अन्तरको जित चाहिने छ । अंक तालिकामा स्विट्जरल्यान्ड तेस्रो स्थानमा छ । टोलीको एक अंक छ  ।

यस्तो अवस्थामा स्वीस टोली जितको लक्ष्यसहित मैदान उत्रनेछ । टोलीलाई अघिल्लो चरण प्रवेश गर्न जित बाहेकको विकल्प छैन । टोलीसँग मारियो गाभरानोभिच, ब्रिल इम्वोलो, जद्रान शाकिरी, ग्रानिट झाका, म्यानुयल एकान्जी, फावियन स्चर र गोलरक्षक यान सोम्मेर रहेका छन् ।

सुरुआती दुई खेल गुमाए टर्कीको अगाडि बढ्ने सम्भावना गणितीय मात्र रहनेछ । शीर्ष २ मा पर्ने सम्भावना सकिसकेको टर्कीलाई तेस्रो स्थानमा रहन राम्रो गोलअन्तरको आवश्यकता छ । बढी गोल अन्तरमा जित हात पार्दै टर्की अघिल्लो चरणको सम्भावनालाई जीवितै राख्न चहान्छ । टोली कम्तीमा पनि एक खेलमा जित हात पार्दै अथवा अंक जोड्दै सुखद बिदाई पनि लिन चाहन्छ ।

टोलीसँग बुराक यिल्माज, ओजान तुफान, हकान कलहानोग्लु, काग्लर सोयन्कु, मेमेट जेकी सेलिक, मेरिह देमीरल र गोलरक्षक काकिर रहेका छन् ।

यि दुई टोलीबीचको हालसम्मको १५ खेलको नतिजामा टर्की बलियो छ । टर्कीले ८ खेल आफ्नो पक्षमा पार्दा ४ खेल स्वीस टोलीले जितेको छ । ३ खेल बराबरीमा सकिएको छ । पछिल्लो दुई खेलमा टर्कीले जित हात पारेको छ । यि दुई टोलीले पछिल्लोपटक २००८ को युरोमा प्रतिस्पर्धा गरेको थियो । जसमा टर्की २–१ ले विजयी भएको थियो ।

यो पनि : युरो २०२० : अन्तिम १६ मा पुग्न कसलाई के आवश्यक?