एजेन्सी – विश्वकै सबैभन्दा पुराना प्रतिद्वन्द्वीका रुपमा लिइने इंग्ल्यान्ड र स्कटल्यान्डबीच युरोपेली च्याम्पियनसिपको समूह डीको दोस्रो खेलमा प्रतिस्पर्धा हुँदैछ । खेल लन्डनस्थित वेम्बली रंगशालामा नेपाली समयअनुसार मध्यरात १२:४५ बजे सुरु हुनेछ ।

सन् १९९६ को युरोमा इंग्ल्यान्ड र स्कटल्यान्डबीच भएको खेलमा युरो इतिहासकै चर्चित गोल भएको थियो । उक्त खेलमा इंग्ल्यान्डका पल गास्कोओइनले गरेको गोललाई अझैपनि दुवै देशका समर्थकले आजसम्म पनि यस खेलसँग जोड्दै आएका छन् । उक्त खेलमा हाल इंग्ल्यान्डका प्रशिक्षक रहेका ग्यारेथ साउथगेट पनि खेलेका थिए । प्रतियोगिता अघि मिडफिल्डर फिल फोडेनले गास्कोइनकै शैलीमा कपाल काटेपछि यस खेल प्रतियोगिता सुरु हुनुअघि नै सबैको नजरमा परेको थियो ।

यी दुईले सन् २०१८ को विश्वकप छनोटमा खेलेका थिए । ५ वर्षअघि भएको उक्त खेलमा इंग्ल्यान्ड ३-० ले विजयी रहेको थियो । सन् २०१७ को मैत्रीपूर्ण खेलमा भने केनले इन्ज्युरी समयमा गोल गर्दै २-२ को बराबरी पक्का गरेका थिए । यी दुईबीच वेम्बली मैदानमा भएको ३२ खेलमा इंग्ल्यान्डले १८ खेल जित्दा स्कटल्यान्ड ९ खेलमा विजयी भएको छ । यी दुई टोलीबीच भएको पछिल्लो १५ खेलमा बराबरी भएको छैन ।

इंग्ल्यान्डले पहिलो खेलमा क्रोएसियालाई पराजित गर्दै ३ अंक जोडेको छ । रहिम स्टर्लिङले दोस्रो हाफमा गरेको गोलसँगै इंग्ल्यान्ड विजयी सुरुवात गर्न सफल भएको थियो । यता स्कटल्यान्ड भने चेक रिपब्लिकसँग २-० ले पराजित हुन पुग्यो । आक्रमणमा एकपछि अर्को अवसर खेर फाल्दा स्कटल्यान्डले हारको सामना गर्नुपरेको थियो । उक्त हारसँगै स्कटल्यान्डको ५ खेलको अपराजित यात्रा टुंगिएको थियो ।

स्कटल्यान्डलाई अब अर्को चरणमा स्थान बनाउने सम्भावना जगाउन आजको खेलमा हार टार्नुपर्ने स्थिति छ । इंग्ल्यान्डले भने आजको खेलमा जित हासिल गरे नकआउट चरणमा स्थान पक्का गर्न सक्छ । युरोकै सबैभन्दा कम अनुभवी टोली रहेको स्कटल्यान्डले आज टोलीमा केहि परिवर्तन गर्न सक्छ । इंग्ल्यान्डका लागि पनि डिफेन्डर ह्यारी मगाएर खेल्ने सम्भावना छ ।