एजेन्सी – विश्वकपको उपविजेता क्रोएसियाले युरोपेली च्याम्पियनसिपको समूह डी अन्तर्गत दोस्रो खेलमा चेक रिपब्लिकक सामना गर्दैछ । खेल ग्लास्गोस्थित ह्याम्पडेन पार्कमा नेपाली समयअनुसार रातको ९:४५ बजे सुरु हुनेछ ।

चेक रिपब्लिकले युरोको पहिलो खेलमा यसै मैदानमा खेल्दै घरेलु टोली स्कटल्यान्डलाई २-० ले पराजित गरेको थियो । उक्त खेलमा फरवार्ड प्याट्रिक सिकले मैदानको मध्यभाग निरबाट गरेको गोलले निकै चर्चा बटुलेको थियो । क्रोएसिया भने पहिलो खेलमा घरेलु टोली इंग्ल्यान्डसँग वेम्बलीमा १-० ले पछि परेको थियो । रहिम स्टर्लिङले दोस्रो हाफमा गरेको गोल नै निर्णायक सावित भएको थियो ।

युरोको अघिल्लो संस्करणमा पनि यी दुई टोलीले समूह चरणमा खेलेका थिए । उक्त खेलमा इभान पेरिसिच र इभान राकिटिचको गोलमा २-० ले पछि परेपनि अन्तिम १५ मिनेटमा चेक खेल बराबर गर्न सफल रहेको थियो । क्रोएसिया त्यस संस्करणमा समूह विजेता बनेको थियो भने चेक १ अंकसहित पुछारमा रहयो । चेकविरुद्ध मैत्रीपूर्ण खेलमा क्रोएसियाले १ जित र १ बराबरीको नतिजा निकालेको छ ।

क्रोएसियाका लागि मिडफिल्डरद्वय लिका मोड्रीच र मार्सेलो ब्रोजोभिच नै मुख्य खेलाडी हुनेछन् । इंग्ल्यान्डविरुद्ध यी दुइले संघर्ष गरेपछि आक्रमणमा पनि टोली कमजोर देखिएको थियो । गोलरक्षक डोमिनिक लिभाकोभिचबाट पनि पछिल्लो खेलकै प्रदर्शन दोहोरिने अपेक्षा हुनेछ । आजको खेलमा पराजित भए क्रोएसिया अर्को चरणमा पुग्ने सम्भावना निकै कम हुनेछ ।

यता चेक पहिलो खेलमा सिकको दुई गोलमा जितबाट उच्च मनोबलमा छ । स्कटल्यान्डले तुलनात्मक रुपमा राम्रो प्रदर्शन गरेपनि सेभियाका गोलरक्षक टोमस भाच्लिकले सानदार प्रदर्शन गरेका थिए । मिडफिल्डमा एलेक्स कराल र टोमस सुचेक आज पनि मिडफिल्ड प्रतिस्पर्धामा निर्णायक हुने देखिन्छ ।

यस समूहमा चेक र इंग्ल्यान्डको ३-३ अंक छ भने क्रोएसिया र स्कटल्यान्ड खाता खोल्ने प्रयासमा छन् । आज नै हुने अर्को खेलमा इंग्ल्यान्डले छिमेकी प्रतिद्वन्द्वी स्कटल्यान्डको सामना गर्नेछ ।