एजेन्सी – समूह ‘सी’ मा पहिलो जित निकालेको नेदरल्यान्ड्स र अष्ट्रिया आज राति आमने सामने हुँदैछन् । खेल नेपाली समयअनुसार योहान क्रुएफ एरिना आम्स्ट्रडममा राति १२:४५ बजे हुनेछ ।

सात वर्षपछि कुनै ठूलो प्रतियोगिता खेलिरहेको नेदरल्यान्ड्स आफ्नो गर्विलो इतिहासअनुसार खेल्दै समूहमा पहिलो भएर अघि बढ्ने लक्ष्यमा हुनेछ । अष्ट्रिया पनि सफलता हात पार्दै अघिल्लो चरण पुग्ने दाउमा हुनेछ । दुवै टोली समूहमा लगातार दोस्रो जितको खोजीमा रहँदा समूह चरण पार गर्नको लागि यो खेल दुवै टोलीका लागि निकै महत्वपुर्ण रहेको छ ।

टोलीसँग जर्जिन्हो वाइनाल्डम, मेम्फिस डिपाए, फ्रान्की डि जोङ, अघिल्लो खेलमा प्रभावशाली प्रदर्शन गरेका डेन्जेल डमफ्राइज, नाथन एके र स्टेफन डि भ्राएको साथ रहेको छ । पहिलो खेलमा डिफेन्समा केहि कमजोरी भएपनि डच टोली जित हासिल गर्न सफल रहेको थियो । टोली त्यसलाई सुधार्ने लक्ष्यमा हुनेछ ।

यता, जुनसुकै भुमिकामा खेल्न सक्ने डेभिड अलाबाको कप्तानीमा रहने अष्ट्रियासँग मार्सेल सवित्जर, कोर्नाड लेइमार, भालेन्टिनो लजारो, मार्सेल सवित्जर, जुलियन, एलेसान्द्रो स्कफ, ड्यानियल बचमन र करिम ओनिसियो जस्ता खेलाडीको साथ रहेको छ । नर्थ म्यासेडोनियाविरुद्ध गोल गरेका मार्काे अर्नाउटोभिच युइएफएको एक खेलको प्रतिबन्धमा पर्दा उनले नेदरल्यान्ड्सविरुद्धको महत्वपुर्ण खेल गुमाउनेछन् ।

यि दुई टोली २०१६ पछि पहिलोपटक भिड्न लागेका हुन् । दुई खेलको नतिजामा दुवैपटक डच टोली विजयी भएको छ । २०११ मा ३–१ को जित निकालेको डच टोलीले त्यसपछि २०१६ मा २–० को जित निकालेको थियो । डच टोली सोही जितलाई निरन्तरता दिने लक्ष्यमा रहँदा अष्ट्रिया उक्त हारको श्रृंखला तोड्न दाउमा हुनेछ । यो समूह ‘सी’ मा नेदरल्यान्ड्स र अष्ट्रियाको समान ३ अंक छ ।