एजेन्सी – युरोपेली च्याम्पियनसिपको समूह चरणको दोस्रो राउन्डको खेलमा आज राति विभिन्न तीन खेलमा प्रतिस्पर्धा हुँदैछ । समूह ‘सी’ मा युक्रेनले नर्थ म्यासेडोनियाको सामना गर्दा समुह ‘सी’ कै अर्काे खेलमा नेदरल्यान्ड्सले अष्ट्रियासँग खेल्दा समूह ‘बी’ मा डेनमार्कले बेल्जियमको सामना गर्दैछ ।

युक्रेन र नर्थ म्यासेडोनियाबीचको खेल रोमानियास्थित एरिना नेसनल बुखारेस्टमा नेपाली समयअनुसार साँझ ६:४५ बजे हुनेछ । दुवै टोली समूहमा पहिलो जितको खोजी हुनेछ । युक्रेन पहिलो खेलमा नेदरल्यान्ड्ससँग ३–२ ले पराजित हुँदा नर्थ म्यासेडोनियाले अष्ट्रियालाई ३–१ ले नजिता सुम्पिएको थियो ।

समूह चरण पार गर्न दुवै टोलीलाई जितबाहेकको विकल्प छैन । यस्तो अवस्थामा दुवै टोली जितको खोजीमा हुनेछ । बराबरी या हारले दुवै टोलीको समूह चरण पार गर्ने सम्भावना झिनो बन्नेछ । युक्रेनसँग रोमन यारेमचुक, माइकोला सापारेन्को, एन्ड्रि यार्माेलेन्को, ओलेक्सान्डर जिन्चेन्को, रुस्लान मालिनोभ्स्की, भिटाली माइकोलेन्को, एलेक्सान्डर काराभाइव र गोलरक्षक जर्ज बुस्चानको साथ रहेको छ ।

यता, भेट्रान फरवार्ड गोरान पाण्डवको नेतृत्वमा उत्रने म्यासेडोनिया युरोमा पहिलो जितको खोजीमा हुनेछ । टोलीसँग इभान ट्रिकोभ्स्की, इल्जिफ इल्मास, इनिस बार्धी, इज्जान एलिओस्की, भिसार मुस्लिउ, बोवान निकोलोभ र स्टोल डिमिट्रिभ्स्कीको साथ रहेको छ ।

समूह ‘सी’ मा दुवै टोली अंकविहीन हुदा युक्रेन तेस्रो तथा नर्थ म्यासेडोनिया पुछारमा रहेको छ । यि दुई टोलीको पछिल्लो दुवै भेटमा युक्रेन विजयी भएको छ । २०१६ को लागि २०१५ मा भएको युरो छनोटमा प्रतिस्पर्धा हुदा युक्रेनले दुवै खेलमा १–० र २–० को जित निकालेको थियो ।