एजेन्सी – विश्व कपको साविक विजेता फ्रान्स र जर्मनीबीच मंगलबार युरो कपको रोचक प्रतिस्पर्धाका बीच एउटा घटनामा भने रेफ्रीको पनि ध्यान गएन । फ्रान्सले जर्मनीलाई १–० ले हराएको खेलमा जर्मन डिफेन्डर एन्टोनियो रुडिगरले फ्रान्सका मिडफिल्डर पल पोग्बालाई ढाडमा टोक्न खोजेको देखिएको थियो ।

खेल दौरान नै भएको यस घटनामा दुई खेलाडीबीच केहि विवाद भएको थियो वा थिएन भन्ने प्रष्ट थिएन । जर्मन रक्षक फ्रान्सका पोग्बा नजिक पुगरे पछाडिबाट टास्सिन खोजेका थिए । त्यो व्यवहारमा पोग्बाले असहज महसुस गरे । त्यसपछि उनले पछाडि फर्केर हेरे ।

केहि भइराखेको छ भन्ने लागेपछि उनले रेफ्रीको ध्यानाकर्ष गराउन चाहेका थिए । तर रेफ्रीले त्यहाँ केहि भएको महसुस गरेनन र त्यसमा कुनै प्रतिक्रिया जनाएनन् । रुडिगरले पोग्बालाई टोक्न खोजेको दृश्य टेलिभिजनमा देखिएको थियो । तर भिएआरले पनि त्यसमा कुनै अवरोध गरेन ।

खेलपछि पोग्बा र रुडिगर दुवैले खेलपछि अंकमाल गरेका थिए । पोग्बाले खेलपछि बोल्दै आफूलाई त्यस्तो केहि नलागेको र दुवै राम्रो साथी रहेकाले खेलदौरान मजाक गरेको उनले बताएका थिए । पोग्बाले यस्तो सानो घटनाले रुडिगरलाई कारवाही नहोस भन्ने चाहेका थिए । यूईएफएले पनि यस घटनाबारे केहि जानकारी दिएको छैन ।

युरो कपमा फ्रान्स र जर्मनी सम्मलित समूह एफलाई ग्रुप अफ डेथका रुपमा लिइएको छ । जसमा फ्रान्स र पोर्चुगलले विजयी सुरुवात गरेका छन् । मंगलबार नै भएको समूहको अर्को खेलमा साविक विजेता समेत रहेको पोर्चुगलले हंगेरीलाई ३–० ले हराएको थियो ।

पोर्चुगललाई जित दिलाउन कप्तान क्रिस्टियानो रोनाल्डोले २ गोल गरेका थिए । त्योसँगै युरो कपमा उनको सर्वाधिक ११ गोल पुगेको छ । रोनाल्डोको यो पाँचौं युरो कप हो । युरो कपको पाँचवटा संस्करण खेल्ने रोनाल्डो पहिलो खेलाडी पनि बनेका छन् ।