एजेन्सी – युरोपेली च्याम्पियनसिप अन्तरगत समूह ‘ए’ को दोस्रो चरणको खेलमा टर्की र वेल्स मैदानमा उत्रँदा दुवै टोली पहिलो जितको खोजीमा हुनेछन् ।

टर्की र वेल्सबीचको खेल अजरवैजान बाकुस्थित बाकी ओलम्पिया स्टेडियममा नेपाली समयअनुसार राति ९:४५ बजे हुनेछ । टर्की पहिलो खेलमा बलियो इटालीसँग ३–० ले पराजित हुदा वेल्सले स्वीट्जरल्यान्ड्ससँग १–१ गोलको बराबरी खेल्दै अंक जोडेको थियो ।

दुवै टोलीलाई समूह चरण पार गर्ने सम्भावना जीवित राख्न जितको खाँचो छ । पहिलो खेलमा इटालीसँग पराजित भएको ‘डार्क हर्स’ टर्की उक्त खेलको कमजोरीलाई सुधार गर्दै वेल्सविरुद्ध उत्रनेछ । बुराक यिल्माज, हकान कलहानोग्लु, सेन्गिज अन्डर, ओजान तुफान, काग्लर सोयुन्कु र मेरिह देमीरल टोलीमा रहेका छन् ।

यता, पहिलो खेलमा स्वीसलाई बराबरीमा रोकेको वेल्स टर्कीलाई हराउँदै अंक तालिका सुधार गर्ने लक्ष्यमा हुनेछ । टोलीसँग कप्तान ग्यारेथ बेलसँगै आरोन राम्से, काइफर मुर, ड्यानियल जेम्स, बिन डेभिस र ड्यानी वार्डजस्ता चर्चित खेलाडीहरुको साथ रहेको छ ।

वेल्सले टर्कीविरुद्धको ६ मध्ये ३ खेलमा जित हासिल गरेको छ । दुई हार र एक बराबरीको नतिजा छ । यि दुई टोली १९९७ पछि पहिलोपटक एक आपसमा भिड्न लागेका हुन् । त्यसबेला टर्कीले ६–४ को जित निकालेको थियो ।

यही समूह ‘ए’ को अर्काे खेलमा आज राति नै इटाली र स्वीट्जरल्यान्डबीच प्रतिस्पर्धा हुदैछ । खेल राति १२ः४५ बजे हुनेछ । इटाली २ अंक जोडेर शीर्षस्थानमा रहँदा स्वीट्जरल्यान्ड र वेल्सले समान १ अंक जोड्दा टर्की अंकविहीन छ ।