एजेन्सी – युरोपेली च्याम्पियनसिपको समूह चरणको दोस्रा राउन्डको खेलमा आज राति समूह ‘बी’’ मा रहेको फिनल्यान्ड र रसियाबीच प्रतिस्पर्धा हुँदैछ ।

खेल रसियन फेडेरेसन सेन्ट पिटर्सवर्गमा नेपाली समयअनुसार साँझ ६:४५ बजे हुनेछ । युरो कपमा पहिलो पटक सहभागिता जनाइरहेको फिनल्यान्ड पहिलो खेलमा नै जित हात पारेपछि सोही जितको लयलाई रसियाविरुद्ध पनि कायम राख्न चाहन्छ । फिनल्यान्डले पहिलो खेलमा डेनमार्कलाई १–० ले पराजित गरेको थियो ।

उक्त खेलमा डेनिस टोलीका मुख्य फरवार्ड क्रिस्टियन एरिक्सन पहिलो हाफको अन्त्यतिर अकस्मात मैदानमा ढलेपछि खेल रोकिएको थियो । उक्त घटनापछि खेल हुँदा फिनल्यान्डको जित रचेको थियो ।

उक्त घटनाले फिनल्यान्डको जित ओझेलमा परेपनि टोली रसियाविरुद्ध उच्च मनोबलका साथ मैदान उत्रनेछ । टोलीसँग टिमु पुकी, जोएल पोहानपालो र गोलरक्षक लुकास ह्रादेच्कीजस्ता खेलाडीको साथ रहेको छ । यि खेलाडीले डेनमार्कविरुद्ध उच्च प्रदर्शन गरेका थिए ।

यता, पहिलो खेलमा नै बलियो बेल्जियमसँग ३–० ले निराश बनेको रसियालाई समूह चरणबाट अघि बढ्न जितको खाँचो छ । बराबरी या हारले टोलीको अघिल्लो चरण पुग्ने सम्भावना झिनो बन्नेछ । सोही कारण रसिया घरेलु मैदानमा फिनल्यान्डलाई हराउने लक्ष्यमा मैदानमा उत्रनेछ ।
टोलीसँग नाम चलेका अर्टिम ज्युवा, एलेक्सान्दर गोलोभिन र एलेक्सी मिरानचुकलगायतको खेलाडीको साथ छ ।

रसियाले फिनल्यान्डविरुद्धको सबै चार खेलमा जित हात पारेको छ । रसिया सोही जितलाई निरन्तरता दिने लक्ष्यमा रहँदा फिनल्यान्ड रसियासँगको हारको श्रृंखला तोड्ने दाउमा हुनेछ ।

समूह चरणमा सबै टोलीले समान एक खेल खेल्दा बेल्जियम ३ अंक जोडेर शीर्षस्थानमा रहेको छ । समान ३ अंक भएपनि फिनल्यान्ड दोस्रो स्थानमा रहँदा अंकविहीन डेनमार्क र रसिया पुछारमा रहेको छ । यही समूहको अर्काे खेलमा बिहीबार राति डेनमार्क र बेल्जियमबीच प्रतिस्पर्धा हुनेछ ।