एजेन्सी – कोपा अमेरिका अन्तर्गत समूह चरणको पहिलो खेलमा अर्जेन्टिना चिलीसँग बराबरीमा रोकियो । कप्तान लिओनेल मेस्सीले फ्रिकिकमा गोल गर्दै अर्जेन्टिनालाई अग्रता दिलाएपनि चिली खेलमा फर्कंदै १-१ को बराबरीमा रोक्न सफल रहयो ।

खेलपछि बोल्दै मेस्सीले अर्जेन्टिनाले अपेक्षा अनुसार प्रदर्शन गर्न नसक्नुमा मैदानले साथ नदिएको बताए । ‘हामीले नतिजा आफ्नो पक्षमा पार्न अपेक्षा अनुसार प्रदर्शन गर्न सकेनौं । मैदानले पनि ह्मैलाई साथ दिएन । त्यसैले गर्दा बलमा नियन्त्रण राख्न सकेनौं र खेलको गति आफूले चाहेजस्तो बढ्न सकेन,’ उनले भने, ‘ चिलीले यसकै फाइदा उठायो र खेल बराबर गर्न सक्यो ।’

चिलीले पेनाल्टी प्राप्त गरेपछि भिडालको प्रहार चुकेपनि रिबाउन्डमा एडुआर्डो भार्गासले गोल गरेका थिए । मेस्सीले पेनाल्टीले नै खेल परिवर्तन भएको बताए । ‘मैले पेनाल्टी हो होइन त देखिन, तर त्यो नै खेल परिवर्तन गर्न पर्याप्त रहयो । जब चिलीले पेनाल्टी पायो, उनीहरु संयमित भएर खेल्न पाए । बलमा पकड जमाउन थाले र हामीलाई खेलमा फेरी बढ्न कठिन भयो,’ उनले भने ।

मेस्सीले यस नतिजा सन्तोषजनक नरहेको बताए । ‘आज हामीलाई जित्नु थियो । विजयी सुरुवात हुँदा मनोबल पनि बढ्थ्यो । अब हामी अर्को कठिन प्रतिद्वन्द्वीसँग खेल्दैछौं । उरुग्वेसँग जित्ने नै लक्ष्य छ । खेल निकै प्रतिस्पर्धात्मक हुने अपेक्षा छ,’ उनले थपे ।

चिलीका कप्तान क्लाउडियो ब्राभोले मेस्सीको फ्रिकिकको प्रशंसा गर्दो आफ्नो टोलीले राम्रो खेलेको बताए । ‘मेस्सीसँग त्यो क्षमता छ जो कसैसँग छैन । अरुभन्दा फरक रुपमा प्रस्तुत हुन्छन्,’ उनले भने, ‘विश्वकप छनोटमा मैले बचाएको थिएँ, आज उनले जिते । फुटबल यस्तै हो । विपक्षी टोलीमा उत्कृष्ट खेलाडी हुँदा खेल्न अझ उर्जा आउँछ । आज हामीले राम्रो प्रदर्शन गर्यौं र यसले आउने दिनमा हामीलाई सहज बनाएको छ ।’

यो पनि : फ्रान्स र जर्मनी खेल्दै

कोपा अमेरिकाको खेल तालिका नेपाली समयअनुसार