एजेन्सी – युरोपेली च्याम्पियनसिपको समूह चरणको खेलमा आज (सोमबार) राति समूह ‘डी’ को स्कटल्यान्ड र स्लोभाकियाले प्रतिस्पर्धा गर्दा समूह ‘ई’ को दुई खेल हुँदैछ ।

समूह ‘ई’ मा रहेको पोल्यान्डले सेन्ट पिटर्सवर्ग रसियामा स्लोभाकियासँग खेल्दैछ । खेल नेपाली समयअनुसार राति ९:४५ बजे हुनेछ । पछिल्लो तीन खेलमा जित निकाल्न नसकेको पोल्यान्ड स्लोभाकियालाई हराउँदै जितको लयमा फर्कन चाहन्छ ।

लय गुमाएको पोल्यान्डले गत मार्चमा विश्वकप छनोटमा एन्डोरालाई ३–० ले हराएपछि तीन खेलमा जित निकाल्न सकेको छैन । यस्तोमा दुई बराबरी र एक हारको नतिजा छ । सोही कारण पनि स्लोभाकिया बलियो विपक्षी टोली नभएपनि खेलमा चर्काे दवाव पक्कै हुनेछ ।

पोल्यान्ड टिमका मुख्य खेलाडी निर्विवाद रूपमा रोबर्ट लेवान्डोस्की नै हुन् । उनी आफै भने लयमा रहेपनि टोलीसँग तालमेल मिल्न सकेको छैन । पोल्यान्डसँग कप्तान लेवान्डोस्कीसँगै पिओटर जिलेन्स्की, मेट्स्ज क्लिच, जाकुव मोडर, जान बेडनारेक, कामिल जिलिक र गोलरक्षक वजएिसस सेजेस्नीको साथ रहेको छ ।

यता, आफै पनि निकै उतारचढावपूर्ण लयबाट गुज्रिरहेको स्लोभाकिया पनि पोल्यान्डलाई रोक्ने दाउमा हुनेछ । टोलीसँग ओन्ड्रेज डुडा, रोबर्ट माक, मारेक हाम्सिक, लुकास हरास्लिन, मिलान स्क्रिनिएर र मार्टिन डुभराभकाको साथ रहेको छ । स्लोभाकियाले पछिल्लो १३ खेलमा तीन जित निकाल्दा ६ बराबरी र चार हारको नतिजा निकालेको छ । स्लोभाकिया पछिल्लो पाँच खेलमा अपराजित रहेपनि एकमात्र जितको नतिजा छ ।

यि दुई टोली २०१३ पछि पहिलोपटक एक आपसमा भिड्न लागेका हुन् । त्यसबेला मैत्रीपुर्ण खेलमा स्लोभाकिया २–० ले विजयी भएको थियो । त्यसअघि २०१२ को मैत्रीपूर्णमा पोल्यान्डले १–० को जित पाएको थियो ।