एजेन्सी – युरोपेली च्याम्पियनसिपको समूह चरणको खेलमा आज (सोमबार) राति विभिन्न तीन खेलमा प्रतिस्पर्धा हुँदैछ । समूह ‘डी’ को स्कटल्यान्ड र चेक रिपब्लिकले प्रतिस्पर्धा गर्दा समूह ‘ई’ को दुई खेल आज राति नै हुनेछ ।

जायन्ट किलरको छवि बनाएको स्कटल्यान्डले २३ वर्षपछि ठुलो प्रतियोगिताको लागि मैदान उत्रदा चेक रिपब्लिकलाई हराउने लक्ष्यमा हुनेछ । खेल ग्लास्गोमा नेपाली समयअनुसार राति ६:४५ बजे हुनेछ । स्कटल्यान्ड सन् १९९८ पछि पहिलोपटक ठुलो प्रतियोगितामा उत्रदैछ ।

स्कटल्यान्ड १९९८ को विश्वकपको समूह चरणमा मोरोक्कोसँग ३–० ले पराजित भएको थियो । यस्तै स्कटल्यान्डले सन् १९९६ पछि पहिलोपटक युरोपियन च्याम्पियनसिप खेल्दैछ । कुनै समय नियमित ठूला प्रतियोगिता नियमित खेल्ने स्कटल्यान्डले यसपल्ट प्लेअफको बाटोबाट युरोमा छनोट भएको हो । टोलीका प्रशिक्षक स्टिभ क्लार्कले टोलीको जायन्ट किलरको पुरानो छविलाई कायम राख्ने बताएका छन् ।

इतिहास पल्टाउने हो भने स्कटल्यान्डले नेदरल्यान्ड्स र स्पेनजस्ता टिमलाई हराएको छ । स्कटल्यान्डले सन् १९९९ मा इंग्ल्यान्डलाई हराएको थियो । ‘हामी पुरानो छविमा फर्कन चहान्छौ । त्यस्तै खेल्ने रणनीति छ । ठूला टिममाथि स्तब्धपूर्ण नतिजा निकाल्न सक्षम छौं ।’ प्रशिक्षक क्लार्कले भनेका छन् । चेकविरुद्धका पछिल्ला चार मध्ये तीन खेलमा जित पाएको स्कटल्यान्ड उत्साहित भएर मैदान उत्रनेछ ।

यता, चेक पनि स्कटल्यान्डलाई हराउँदै युरोमा सुखद सुरुवात गर्न चाहन्छ । तर, चेकले पछिल्लो चार खेलमा स्कटल्यान्डलाई हराउन सकेको छैन । चेकले पछिल्लोपटक २०१० मा स्कटल्यान्डलाई १–० ले पराजित गरेको थियो ।

स्कटल्यान्डको सम्भावित सुरुवाती ११ : डेभिड मार्सल, ज्याक हेन्ड्री, ग्रान्ट हान्ले, काइरन टिएरने, स्टेफेन ओडोन्नेल, स्कट म्याकटोमिने, कलुम म्याकग्रिगर, जोन म्याकजिन, एन्ड्रिउ रोबर्टसन, लेन्डन डेकेस र चे एडाम्स

चेकको सम्भावित सुरुवाती ११ : थोमस भाक्लिक, भ्लादिमिर कोउफल, अन्ड्रेज सेलुस्ट्का, थोमस कालास, जान बोरिल, थोमस सोउसेक, एलेक्स केरल, लुकास मासोपुस्ट, भ्लादिमिर डारिदा, जाुकव जान्कटो र प्याट्रिक स्चिक