एजेन्सी – युरोपेली च्याम्पियनसिपको तेस्रो दिन आज (आइतबार) समूह चरणको विभिन्न तीन खेलमा प्रतिस्पर्धा हुँदा नेदरल्यान्ड्स सन् २०१४ पछि पहिलोपटक ठुलो प्रतियोगितामा फर्कदैछ ।

समूह ‘सी’ मा रहेको नेदरल्यान्ड्सले घरेलु मैदान योहान क्रुएफ एरिना आम्स्टरडममा युक्रेनको आतिथ्यता गर्नेछ । खेल राति १२:४५ बजे हुनेछ । सन् २०१६ को युरो र २०१८ को विश्वकपमा छनोट हुन असफल रहेको नेदरल्यान्ड्स फेरि एकपल्ट ठूलो प्रतियोगितामा फर्किएको छ । टोलीका लागि युरो २०२० आफ्नो प्रतिष्ठा कायम राख्ने प्रतियोगिता हुनेछ ।

ब्राजिल विश्वकपपछि टोली ठुला प्रतियोगितामा फर्कदा टोलीसँग सेन्टर ब्याकका स्टार खेलाडी भर्जिल भान डाइकको उपस्थिति रहनेछैन । उनी घुँडाको चोटमुक्त हुनेक्रममा छन् । तर नेदरल्यान्ड्स टिममा प्रतिभाशाली खेलाडीको कुनै कमी हुनेछैन ।

निकै लयमा रहेका मेम्फस डिपाए, वोआउट वेगह्रस्ट, ओवेन विज्डल, जर्जिन्हो वाइनाल्डम, मार्टिन डि रुन, फ्रान्की डि योङ, डेन्जेल डुमफ्राइज, दाले ब्लिन्ड, स्टेफन डि भर्ज, म्याथिज डे लेग्ट र मार्टिन स्टेकेलेनवर्गको साथ रहेको छ । यसबाहेक टोलीसँग जोएल भल्टम्यान, नाथन एके, क्पिन्सी प्रोमेस र डाभी क्लासेन पनि रहेको छ ।

यता, लगातार तेस्रोपटक युरो खेलरिहेको युक्रेन बलियो डच टोलीलाई हराउँदै सुखद सुरुवात गर्ने लक्ष्यमा हुनेछ । सन् २०१६ को संस्करणमा युक्रेन कुनै गोल गर्न असफल रहेको युक्रेनले यसपल्ट राम्रो प्रदर्शनको अपेक्षा गरिएको छ । यसको कारण हो । छनोट चरणमा टोलीको दमदार प्रदर्शन । तर, टोली पछिल्लो ६ खेलमा अपराजित रहेपनि मात्रै दुई जित छ । ६ मध्ये पछिल्लो दुई जितले टोलीले युरोकपको लागि तयार रहेको संकेत दिएको छ ।

टोलीसँग युरोपियन फुटमा प्रभाव जमाएका खेलाडीहरुको साथ रहेको छ । रोमन यारेमचुक, एन्ड्रिया यार्माेलेन्को, ओलेक्सान्डर जुकोभ, रुस्लान मालिनोभ्स्की, ओलेक्सान्डर जिनचेन्को, भिटाली माइकोलेन्को, माइकोला माट्भियान्को र जर्ज बुस्चान रहेका छन् । यि दुई टोली २०१० पछि पहिलोपटक भिड्न लागेको हो । त्यतिबेलाको मैत्रीपुर्ण खेल १–१ गोलको बराबरीमा सकिएको थियो ।