एजेन्सी – युरोपेली च्याम्पियनसिप अन्तरगत आज राति समूह चरणको विभिन्न तीन खेलमा प्रतिस्पर्धा हुदैछ । समूह ‘डी’ मा इंग्ल्यान्ड र क्रोएसियाले प्रतिस्पर्धा गर्दा समूह ‘सी’ तर्फ अष्ट्रिया र नर्थ म्यासेडोनिया तथा नेदरल्यान्ड्स र युक्रेनबीच आज राति नै प्रतिस्पर्धा हुँदैछ ।

अष्ट्रिया र नथ म्यासेडोनियाबीचको खेल नेपाली समयअनुसार राति ९:४५ बजेपछि बुकारेस्टस्थित एरिना नासिनोलामा हुनेछ । जर्मन बुन्डेसलिगामा प्रभावशाली प्रदर्शन गरेका खेलाडीको बाहुल्यता रहेको अष्ट्रिया पहिलोपटक युरोकपमा प्रतिस्पर्धा गर्न लागेको नर्थ म्यासेडोनियालाई हराउँदै विजयी सुरुवात गर्न चाहन्छ । तर, सरप्राइज नर्थ म्यासेडोनियाविरुद्ध मैदान उत्रदा टोलीलाई एक प्रकारको दवाव हुनेछ ।

टोलीका लागि सबैभन्दा ठुलो नाम यसै सिजनमात्रै स्पेनिस क्लब रियल म्याड्रिडले अनुबन्ध गरेको डेभिड अलावा नै हुन् । यसबाहेक टोलीसँग कोर्नाड लेइमार, भालेन्टिनो लजारो, मार्सेल सवित्जर, जुलियन, एलेसान्द्रो स्कफ, मार्काे एराउनोटोभिक, ड्यानियल बचमन र करिम ओनिसियो जस्ता खेलाडीको साथ रहेको छ । सन् २००८ र २०१६ मा दुईपल्ट युरो खेलेको अष्ट्रियाले दुई बराबरी र चार हार आत्मसात गरेको छ । छनोट चरणमा अस्ट्रियाले म्यासेडोनियालाई दुवैपल्ट हराएको थियो ।

यता, म्यासेडोनिया पहिलोपल्ट प्रतियोगिता खेलिरहँदा डेब्युू खेलमा जित निकालेर यसलाई सम्झनलायक बनाउन चाहन्छ । सन् १९९१ मा युगोस्लाभियाबाट स्वतन्त्र भएको म्यासेडोनिया पहिलोपल्ट कुनै ठूलो प्रतियोगिता खेलिरहेको छ । टोलीको युरोकपसम्मको यात्राको लागि नेसन्स लिगको प्लेअफमार्फत जर्जियालाई पन्छाएको थियो ।

टोलीसँग भेट्रान फरवार्ड गोरान पाण्डभ, एलेक्सान्डर ट्राजकोभ्स्की, इल्जिफ इल्मास, इनिस बार्दी, बाबन निकोलोभ र इजीजान एलिओस्कीलगायतका नाम चलेका खेलाडीको साथ रहेको छ । यि दुई टोलीले हालसम्म दुई खेल खेल्दा दुवैपटक अष्ट्रियाले जित निकालेको थियो । दुवै खेल युरोकपकै लागि छनोटमा रहेको थियो ।