एजेन्सी – युरोपेली फुटबलको सर्वोच्च प्रतियोगिता युरोपेली च्याम्पियनसिप २०२० शुक्रबारदेखि सुरु हुँदैछ । अघिल्लो वर्ष हुने तय यस प्रतियोगिता कोरोना भाइरस संक्रमणका कारण सन् २०२१ मा हुन लागेको हो ।

प्रतियोगिता एक वर्षले पछि सर्दा थुप्रै युवा खेलाडीलाई फाइदा पुगेको छ । अघिल्लो वर्ष टोलीमा पर्ने सम्भावना नै नरहेका केहि खेलाडीले यस सिजन क्लब स्तरमा उत्कृष्ट प्रदर्शन गर्दै आफ्नो स्थान पक्का गरेका छन् । केहि यस्ता खेलाडी पनि छन् जसले कम उमेरका बाबजुद आफ्नो सिनियर टोलीमा निकै प्रभाव जमाउन सक्छन् । युरोमा खेल्ने ३ खेलाडी जसले आफूलाई विश्वसामु सिद्ध पार्न सक्छन् ।

पेड्री

बार्सिलोनाका लागि उत्कृष्ट प्रदर्शन गरेपछि युवा मिडफिल्डर पेड्रीले लुइस एन्रिकेको स्पेनिस टोलीमा स्थान बनाउन सफल भएका छन् । उनले छोटो समयमा नै बार्सिलोनाको सिनियर टोलीमा आफूलाई स्थापित गरेका छन् । मात्र १८ वर्ष भएपनि स्पेनिस टोलीमा उनको भूमिका हुने आँकलन गरिएको छ ।

मिडफिल्डमा प्राविधिक रुपमा निपुण उनको पास निकाल्ने क्षमता उत्कृष्ट छ । खेलको अवस्था अनुसार आफ्नो खेल ढाल्न सक्ने उनलाई स्पेनले पहिलो रोजाइमा नै खेलाएपनि आश्चर्य मान्नु पर्दैन । आफ्नो आदर्श आन्द्रेस इनिएस्टाकै झल्को दिने यी युवा मिडफिल्डर स्पेनको युरो यात्रामा महत्त्वपूर्ण कडी बन्न सक्छन् ।

जुड बेलिंघम

बेलिंघम आफैंले पनि पछिल्लो सिजन उनको यो किसिमको उचाइ पुग्ने सोचेका थिएनन् । इंग्ल्यान्डको दोस्रो श्रेणी क्लब बर्मिन्घमबाट बोरुसिया डर्टमुन्ड पुगेका उनले जर्मन क्लबको सिनियर टोलीमा नै आफ्नो स्थान पक्का गरे । नियमित खेल्दै आफ्नो कौशल प्रदर्शन गरेका उनलाई साउथगेटले सिनियर टोलीमा समावेश गर्ने नै भए ।

अष्ट्रियाविरुद्ध मैत्रीपूर्ण खेलमा मात्र १७ वर्ष भएपनि पूरा ९० मिनेट खेल्दै उनले आफ्नो स्तर प्रदर्शन गरे । बक्स टु बक्स मिडफिल्डरको परिचय पाएका उनले इंग्ल्यान्डको मिडफिल्डलाई थप बलियो बनाएका छन् । सिनियर मिडफिल्डर जोर्डन हेन्डरसन शत प्रतिशत फिट नहुँदा जुड साउथगेटका लागि राम्रो विकल्पका रुपमा अघि आएका छन् ।

फेडेरिको किएजा

इटालीको साविक लिग विजेता युभेन्टसको लागि यो सिजन सुखद रहेन । तर युवा फरवार्ड फेडेरिको किएजाको लागि व्यक्तिगत रुपमा भने सकारात्मक पाटो धेरै रहे । सिजन अवधिभर १३ गोल र १० असिस्ट गर्दै उनले युरोपकै भरपर्दा युवा खेलाडीको रुपमा आफूलाई प्रस्तुत गरे ।

क्लबमा प्रदर्शनसँगै इटालीको राष्ट्रिय टोलीमा पनि उनले सुरुवाती भूमिका निर्वाह गर्दै आएका छन् । प्रशिक्षक रोबर्टो मान्सीनीले उनलाई आक्रमणमा थप जिम्मेवारी दिँदै परिपक्व बनाउने प्रयास गरेका छन् । क्रिस्टियानो रोनाल्डोसँग आक्रमणमा सिकेका उनीबाट इटालीका समर्थकले युरोमा पनि आफ्नो क्लबको लयलाई निरन्तरता दिने अपेक्षा राखेका छन् ।

यो पनि : युरो कपको खेल तालिका नेपाली समयअनुसार