एजेन्सी – रियल म्याड्रिडका स्टार फरवार्ड करीम बेन्जेमा फ्रान्सेली राष्ट्रिय टोलीले मंगलबार बुल्गेरियालाई मैत्रीपूर्ण खेलमा पराजित गर्दा घाइते हुन पुगेका छन् ।

खेलको पहिलो हाफमा नै चोट बोकेपछि उनको स्थान ओलिभिएर जिरुडले लिएका थिए । बेन्जेमा घुँडामा चोट बोकेपछि ४० मिनेटमा नै मैदान छोड्न बाध्य भएका थिए । गोल प्रहार गर्ने प्रयासमा इभान तुरीस्तोभसँग जुधेपछि उनी लडेका थिए । उनको दायाँ घुँडामा समस्या देखिएको छ ।

प्रशिक्षक डीडीएर देस्च्याम्प्सले चोटबारे अहिले नै विस्तृत भन्न नसकिने बताए । ‘खासै गम्भीर चोट देखिदैन । उनको घुँडामाथिको मांसपेशीमा ठक्कर लागेको हो । चोट अझै बल्झेला भनेर हामीले कुनै जोखिम लिएनौं । स्वास्थ्य टोली उनको साथमा छ, विस्तृत रुपमा भोली थाहा होला,’ उनले भने ।

बेन्जेमा झन्डै ६ वर्षपछि राष्ट्रिय टोलीमा फर्किएका हुन् । राष्ट्रिय टोलीमा नरहेपनि रियल म्याड्रिडबाट निरन्तर उत्कृष्ट प्रदर्शन गर्दै आएका उनी युरोका लागि टोलीमा परेका थिए । अघिल्लो सातावेल्सविरुद्ध खेल्दै टोलीमा फर्केका उनले बुल्गेरियाविरुद्ध सुरुवाती ११ मा खेल्दै राम्रो प्रभाव जमाएका थिए ।

मैदानबाट निस्किनुअघि उनको र एमबाप्पेको राम्रो तालमेल मिलेको थियो । बेन्जेमाको स्थानमा आएका जिरुडले दुई गोल गर्दा फ्रान्स ३-० ले विजयी भएको थियो ।