एजेन्सी – विश्वविजेता फ्रान्सले अन्तर्राष्ट्रिय मैत्रीपुर्ण खेलमा सानदार जित दर्ता गरेको छ । लामो समयपछि राष्ट्रिय टोलीमा पूनरागमन गरेका करिम बेन्जेमाले पेनाल्टी चुकाएपनि फ्रान्सले १० खेलाडीमा समेटिएको वेल्सलाई ३–० ले पराजित गरेको हो ।

फ्रान्सको जितमा केलियन एमबाप्पे, एन्टोइन ग्रिजमन र औसमाने डेम्वेलेले गोल गरे । पहिलो हाफमा एक तथा दोस्रो हाफमा दुई गोल निस्किएको थियो । एलिएन्ज रिभेरा निसमा बुधबार राति भएको खेलको २६औं मिनेटमा वेल्स १० खेलाडीमा समेटिएको थियो ।

पेनाल्टी बक्समा करिम बेन्जेमाको प्रहारलाई हातले रोकेपछि रेफ्रीले निको विलियम्सलाई रातो कार्ड तथा फ्रान्सलाई पेनाल्टी प्रदान गरेको थियो । तर बेन्जेमाको पेनाल्टी प्रहारलाई ड्यानी वार्डले बचाउँदा प्रलान्स अग्रता लिनबाट चुक्यो । पेनाल्टीमा चुकेपनि फ्रान्सले ३५औं मिनेटमा केलियन एमबाप्पेको गोलबाट अग्रता लियो ।

एन्टोइन ग्रिजमनको प्रहारलाई वेल्सका गोलरक्षक वार्डले बचाएपनि रिवाउन्डमा एमबाप्पेले गोल गर्न सफल भएका थिए । ४२औं मिनेटमा एमबाप्पेले गोल गर्ने सुवर्ण अवसर खेर फालेका थिए । ४७औं मिनेटमा एमबाप्पे र ग्रिजमनको समन्वयमा बनेको मुभमा ग्रिजमनले गोल गर्दै फ्रान्सको अग्रता दोब्बर पारे । ६४औं मिनेटमा आरोन राम्सेको प्रहारमा गोलरक्षक ह्युगो लोरिस बाधक बन्दा वेल्सले गोल अन्तर घटाउन सकेन ।

७९औं मिनेटमा बेन्जेमाले पेनाल्टी बक्समा उत्कृष्ट रुपमा छातीले नियन्त्रणमा लिदै दिएको पासलाई सब्सिच्युट डेम्वेलेले गोल गर्दै फ्रान्सको जित पक्का गरे । डेम्वेले ७३औं मिनेटमा एमबाप्पेको स्थानमा मैदानमा प्रवेश गरेका थिए । १० खेलाडीमा समेटिएपछि वेल्सले बलियो फ्रान्सलाई बेला बेलामा काउन्टर अट्याकमा आक्रमण बुन्ने प्रयास गरेपनि सफल हुन सकेन ।

युरोकपको तयारीका लागि विभिन्न टोलीहरुले अन्तर्राष्ट्रिय मैत्रीपुर्ण खेल खेलिरहेका छन् । युरोकप ११ जुनदेखि ११ जुलाईसम्म युरोपका ११ शहरमा आयोजना हुदैछ ।