काठमाडौं (हाम्रो खेलकुद)– राष्ट्रिय फुटबल टोलीका साथ राष्ट्रिय खेलकुद परिषद् (राखेप) सदस्य सचिव रमेशकुमार सिलवाल जाने भएका छन् । कतार विश्वकप २०२२ तथा एसियन कप २०२३ छनोट र इराकविरुद्धको मैत्रीपूर्ण खेलका लागि मंगलबार यात्रामा निस्कँदैछ ।

नेपाल र इराकको राष्ट्रिय टोलीबीच जेठ १५ गते हुने मैत्रीपूर्ण खेल तय छ । नेपाली टोली मंगलबार राती कतार एयरवेजमार्फत दोहा हुँदै इराक पुग्ने अखिल नेपाल फुटबल संघ (एन्फा) ले जनाएको छ । एन्फाको आग्रहमा आफू राष्ट्रिय टोलीका साथ जान लागेको सदस्य सचिव सिलवालले बताए ।

‘तपाई जाँदा टोलीको मनोबल बढ्छ भन्ने एन्फा अध्यक्ष लगायत पदाधिकारीको आग्रह रह्यो,’ उनले भने, ‘त्यसैले जाँदैछु ।’

सिलवालले इराक र कुवेतका सरकारी खेलकुद निकायका पदाधिकारीसँग भेटघाट हुने बताएका छन् । गत वर्ष दोस्रो पटक सदस्य सचिव बनेका सिलवाल फुटबल टोलीसँय यात्रामा जान लागेका यो पहिलो पटक हो ।

जेठ १६ गते नेपाली टोली स्थलमार्ग हुँदै कुवेत जाने एन्फा अध्यक्षले जानकारी दिए । त्यहाँ टोलीले ३ वटा विश्व कप र एसिया कप छनोटका खेल्नेछ । नेपाली टोलीले जेठ २० गते चाइनिज ताइपेइ, जेठ २५ गते गते जोर्डन र जेठ २८ गते अष्ट्रेलियासँग प्रतिस्पर्धा गर्नेछ ।

नेपाल अहिले अंक तालिकामा ३ अंकका साथ चौथो स्थानमा छ । नेपालको ५ खेलमा १ जित र ४ खेलमा हार बेहोरेको थियो। अंक तालिको पुछारमा रहेको ताइपेइले अंक जोड्न सकेको छैन ।

अष्ट्रेलिया १२ अंकका साथ शीर्षस्थानमा छ भने कुवेत र जोर्डनको समान १० अंक छ । अंक तालिकाको चौथो स्थानमा रहँदै छनोट चरण सकेको खण्डमा नेपालले एसियन कप छनोटको तेस्रो राउन्डमा सोझै स्थान बनाउने अवसर रहनेछ ।

विश्वकपमा छनोट हुने नेपालको सम्भावना भने गणितीय रुपमा मात्र बाँकी छ । २३ खेलाडीसहित ३६ सदस्यी टोलीको आउने जाने हवाई खर्च विश्व फुटबल महासंघ (फिफा) ले बेर्होने यसअघि नै एन्फाले जानकारी दिएको थियो ।

यो पनि पढ्नुहोस : यसपटक नरोकियोस् फुटबलमा परिवर्तन