एजेन्सी – मिडफिल्डर थोमस मुलर र डिफेन्डर म्याट हमेल्सले दुई वर्षपछि जर्मनीको राष्ट्रिय टोलीमा पूनरागमन गरेका छन् ।

प्रशिक्षक जोचिम लोले आसन्न युरोकपको लागि २६ सदस्यीय टोलीको घोषणा गर्दा उनीहरुले दुई वर्षपछि टोलीमा स्थान बनाएका हुन् । प्रशिक्षक लोले नयाँ पुस्तालाई अवसर दिने भन्दै २०१९ मा यि दुई खेलाडीलाई टोली बाहिर राखेका थिए । तर, उनीहरुले क्लब स्तरमा लगातार उच्च प्रदर्शन गरेपछि लो युटर्न भएका हुन् । हमेल्स र मुलरले २०१६ देखि २०१९ सम्म बायर्न म्युनिखबाट सँगै खेलेका थिए ।

‘म साँच्चिकै खुशी छु । जर्मनीबाट पुनः खेल्न पाँउदा गर्व गर्छु,’ टोलीमा स्थान बनाएपछि हमेल्सले प्रतिक्रिया दिएका छन् । यस्तै मुलरले ‘ब्याक अगेन’ लेख्दै पुनरागमन गर्न पाउँदा खुसी व्यक्त गरेका छन् ।

२०१० देखि जर्मनीको राष्ट्रिय टोलीमा रहेका मुलरले १०० क्याप जित्दा ३८ गोल गरेका छन् । यस्तै हमेल्सले जर्मनीका लागि ७० खेल खेल्दा ५ गोल गरेका छन् । यि दुवै खेलाडी जर्मनीले २०१४ मा विश्वकप जित्दा टोलीका मुख्य सदस्य रहेका थिए । आगमी ११ जुनबाट शुरु हुने युरोकप युरोपका विभिन्न ११ शहरमा ११ जुनसम्म हुनेछ ।

जर्मनी टोली :

गोलरक्षक – बर्न्ड लेनो, म्यानुयल नुएर र केभिन ट्रयाप

डिफेन्डर – म्याथियस जिन्टर, रोविन गोसिन्स, क्रिस्टियन गन्टर, मार्सेल होल्सटेनबर्ग, म्याट हमेल्स, लुकास क्लोस्टरमान, रोविन कोच, एन्टोनियो रुडिगर र निकलस सुल

मिडफिल्डर र फरवार्ड – इम्री क्यान, सर्ज जिनाब्री, लियोन गोरेट्जका, इल्केए गुन्डोगान, काई हाभर्टज, जोनास होफमन, योसुवा किम्मिख, टोनी क्रुस, थोमस मुलर, जमाल मुसिएला, फ्लोरिएन नेउहस, लिरोए साने, टिमो वेर्नर र केभिन भोलान्ड