एजेन्सी – म्यानचेस्टर सिटीका फ्रान्सेली डिफेन्डर एमेरिक लापोर्टले स्पेनको राष्ट्रिय टोलीबाट अर्को महिना सुरु हुने युरोपेली च्याम्पियनसिप खेल्ने भएका छन् ।

स्पेनको राष्ट्रिय टोलीका प्रशिक्षक लुइस एन्रिकेले स्पेनिस फुटबल महासंघका निर्देशकलाई केहि साता अघि लापोर्टलाई स्पेनबाट खेलाउन सकिने विषयमा छलफल गर्न भनेका थिए । स्पेनको प्रस्तावपछि लापोर्ट आफैंले पनि इच्छुक रहेको बताएका थिए । त्यसलगत्तै कागजी प्रक्रिया सुरु भएको छ । अब स्पेनलाई फिफाको स्वीकृतिको प्रतिक्षा रहेको र यो अब औपचारिकता मात्र बाँकी रहेको बुझिएको छ ।

फ्रान्सको एजेनमा जन्मेका लापोर्ट टिनएजमै एथ्लेटिक बिल्बाओमा अनुबन्धित भएका थिए । उनले उक्त क्लबमा ८ वर्ष बिताएपछि म्यानचेस्टर सिटी पुगेका थिए । सिटीले उनलाई खरिद गर्न ६५ मिलियन युरो खर्चेको थियो ।

लापोर्टले हालसम्म फ्रान्सको उमेर समूहको टोलीका लागि खेलेपनि सिनियर टोलीमा भने अवसर पाएका छैनन् । फ्रान्सका प्रशिक्षक डीडीएर डेस्च्याम्प्सले आफ्नो योजनामा लापोर्ट नरहेको प्रष्ट पारेका थिए । तर स्पेनले भने सन् २०१६ देखि नै उनलाई खेलाउने प्रयास गरेको थियो ।

लापोर्टको स्पेनिस राष्ट्रियता अधिकारिक रुपमा बुधबार पक्का हुने बुझिएको छ । स्पेनका प्रशिक्षकले युरोमा डिफेन्सलाई बलियो बनाउन लापोर्टलाई टोलीमा समेट्न लागेका हुन् । उनीसँगै स्पेनले सर्जियो रामोस, एरिक गार्सिया, पाउ टोरेस र इनिगो मार्टिनेजलाई सेन्टर डिफेन्डरको रुपमा प्रयोग गर्नेछ ।

फिफाको नियम अनुसार उमेर समूहमा अन्य राष्ट्रबाट खेलेका खेलाडीले राष्ट्रियता परिवर्तन गरे सिनियर टोलीमा आफ्नो रोजाईको टोलीबाट खेल्न सक्नेछन् । यसअघि फरवार्ड डिएगो कोस्टाले पनि ब्राजिल छाडेर स्पेनबाट खेलेका थिए ।