काठमाडौं (हाम्रो खेलकुद) – ललितपुर सिटी एफसीले खुकुरी नेपाल सुपर लिग (एनएसएल) मा विराटनगर सिटी एफसीविरुद्ध दोस्रो हाफमा अग्रता दोब्बर पारेको छ ।

मार्की खेलाडी तथा कप्तान अन्जन विष्टले पहिलो हाफमा तथा सब्सिच्युट बिमल रानाले दोस्रो हाफमा गोल गर्दै ललितपुरको अग्रता दोब्बर पारेका हुन् ।

त्रिपुरेश्वरस्थित दशरथ रंगशालामा शनिबार भएको खेलकोसातौ मिनेटमा कमल श्रेष्ठको फ्रिकिकमा भिलिम पोसिन्कोभिकको वान टच प्रहारले साइड नेट गर्दा ललितपुर सिटी एफसी अग्रता लिनबाट चुक्यो । २७औं मिनेटमा सन्तोष तामाङको पेनाल्टी बक्सबाहिरको फितलो प्रहारलाई गोलरक्षक अर्पण कार्कीले सहजै नियन्त्रणमा लिए । ३५औं मिनेटमा एरिक विष्टको फ्रिकिकलाई गोलरक्षक किशोर गिरीले पहिलो बारमा उत्कृष्ट बचाउ गरे ।

३६औं मिनेटमा मिक्चेन तामाङको कर्नरमा बिमल रानाको हेडर प्रयासलाई गोलरक्षक किशोर गिरीले बचाउदा रिवाउन्डमा अन्जन विष्टले हाफ भलीमा सुन्दर गोल गर्दै अग्रता दिलाए । गोल लाइनमा दिवाकर चौधरीले बचाउने प्रयास गरेपनि सफल भएन ।

५७औं मिनेटमा सुनिल बलको कर्नरमा मनिष डाँगीको हेडरलाई गोलरक्षक अर्पण कार्कीले पञ्च गर्दै बचाए । ६३औं मिनेटमा बिमल रानाले गोल गर्दै ललितपुरको अग्रता दोब्बर पारे । डोना थापाले दिएको पासलाई अन्जन विष्टले नियन्त्रणमा लिदै गोलरक्षक किशोर गिरीलाई बिट गर्दै दिएको पासलाई बिमल रानाले खाली पोस्टमा गोल गर्न सफल भएका थिए ।

ललितपुरले दोस्रो गोल गरेलगत्तै विराटनगरका खेलाडीले मैदान छाड्दा खेल झन्डै ७ मिनेट केहीबेर रोकिएको थियो । खेल पुन सुचारु भएको छ ।