काठमाडौं (हाम्रो खेलकुद) – खुकुरी नेपाल सुपर लिग (एनएसएल) मा आज (शनिबार) लिग चरणको अन्तिम राउन्ड अन्तरगत दुई खेलमा प्रतिस्पर्धा हुँदैछ । विराटनगर सिटी एफसी र ललितपुर सिटी एफसीबीच दिउँसो २:३० बजे तथा धनगढी र बुटवलबीच साँझ ५:३० बजे त्रिपुरेश्वरस्थित दशरथ रंगशालामा हुनेछ ।

आजको दुई खेलले शीर्ष चारमा पर्ने सबै टोलीको टुंगो लाग्नेछ । धनगढी एफसी र काठमाडौं रेजर्सले प्ले अफमा स्थान सुरक्षित गरिसक्दा पोखरा थन्डर्स, विराटनगर सिटी एफसी, ललितपुर सिटी एफसी र बुटवल लुम्विनी एफसी शीर्ष चारको दौडमा रहेको छ । यि चार टोलीमध्येबाट दुई टोलीले शीर्षचारमा स्थान बनाउनेछ । एफसी चितवन एक खेल बाँकी छदै शीर्ष चारको दौडबाट बाहिरिएको छ ।

प्ले अफमा स्थान पक्का गरिसकेको धनगढी बुटवल लुम्विनीलाई हराउँदै लिगमा आफ्नो शीर्षतालाई कायम राख्ने लक्ष्यमा रहँदा बुटवल लुम्विनी प्ले अफमा पुगिसकेको धनगढीलाई हराउँदै प्ले अफमा पुग्ने दाउमा हुनेछ । धनगढीलाई हराउन सके बुटवल लुम्विनीले पोखरालाई हेड टु हेडमा पछि पार्दै प्ले अफमा पुग्ने छ । बराबरी र हारले बुटवल लुम्विनी बाहिरिनेछ ।

विराटनगर र ललितपुरले बराबरी खेल्दा बुटवल लुम्विनीले धनगढीलाई हराएको अवस्थामा पोखरा र बुटवल लुम्विनी शीर्ष चारमा पुग्नेछ । विराटनगर हेड टु हेडमा पोखरा र बुटवल लुम्विनीसँग पछि पर्नेछ । समान ८ अंक भएको अवस्थामा बुटवल लुम्विनी र पोखरा हेड टु हेडमा अघि बढ्नेछ ।

लिग चरणमा विराटनगर पोखरासँग १–० ले पराजित हुँदा बुटवल लुम्विनीसँग २–२ गोलको बराबरीमा रोकिएको थियो । यस्तै बुटवल लुम्विनीले पोखरालाई २–० ले हराएको थियो । विराटनगर र ललितपुरले बराबरी खेल्दा बुटवल लुम्विनीले धनगढीसँग हार बेहोरेको अवस्थामा विराटनगर र पोखरा प्ले अफमा पुग्नेछ ।

धनगढीसँग आइकोनिक खेलाडी तथा कप्तान किरण चेम्जोङ, विशाल राई, दिनेश राजवंशी, अशोक खवास, रुपेश केसी, निशान खड्का, सौजन याख्खा राई, निशान लिम्बु, बुद्ध बल तामाङ, दर्शन गुरुङ र रमेश दंगाल टोलीमा छन् । यस्तै टंक बस्नेत, पुजन उपरकोटी, युद्ध शाही, टेकेन्द्र थापा र निराजन महर्जन टोलीमा रहेका छन् । विदेशी खेलाडीमा फ्रान्कलिन कुटे टाल्ला रहेका छन् । ह्यामस्ट्रिङका कारण लिगमा सर्वाधिक चार गोल गरेका नाइजेरियन फरवार्ड ओलावाले ओलाडिपो आफिज खेल्ने सम्भावना कम छ ।

यता बुटवलले राष्ट्रिय टोलीका फरवार्ड अभिषेक रिजाललाई टोलीमा भित्र्याउँदै आक्रमण सुधार्ने प्रयास गरेको छ । मार्की खेलाडीका रुपमा रहेका कप्तान विशाल श्रेष्ठले उत्कृष्ट प्रदर्शन गरिरहेका छन् । डिफेन्समा विदेशी खेलाडी ओमोलाजा, विराज महर्जन, मानबहादुर परियार र मिडफिल्डमा विलियम ओपोकु रहेका छन् । आशिष लामा, लक्ष्मण रुचाल र सुमन लामाले आक्रमणमा थप मिहिनेत गर्नुपर्ने देखिन्छ । रविन श्रेष्ठ चोटका कारण पछिल्लो दुई खेल बाहिर रहेका थिए । उनको अनुपस्थिति भने खड्केको छ । मिडफिल्डमा सेसेहाङ आङदेम्बेलाई खासै समय दिइएको छैन ।

धनगढी १० अंक जोडेर शीर्ष स्थानमा रहँदा समान १० अंक नै भएपनि काठमाडौं हेड टु हेडमा दोस्रो स्थानमा छ । विराटनगर ७ अंक जोडेर तेस्रो स्थानमा रहेको छ । लिगमा शीर्ष दुई स्थान हासिल गर्ने टोलीले फाइनल प्रवेशका लागि २८ बैशाखमा खेल्नेछ । यस खेलमा पराजित हुने टोलीले २९ बैशाखमा तेस्रो र चौथो हुने टोलीबीचको विजेतासँग पुनः फाइनल प्रवेशका लागि ३० बैशाखमा खेल्नेछ । फाइनल १ जेठमा हुनेछ ।

नेपाल स्पोर्टस म्यानेजमेन्टले आयोजना तथा अखिल नेपाल फुटबल संघको प्राविधिक सहयोगमा हुने एनएसएलमा ७ शहरका ७ टोलीको सहभागिता रहेको छ । राउण्ड रोबिनको आधारमा हुने लिग १ जेठसम्म सञ्चालन हुनेछ । एनएसएलमा विराटनगर सिटी फुटबल क्लब, काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, धनगढी एफसी, पोखरा थन्डर्स र बुटवल लुम्बिनी एफसी रहेका छन् ।

प्रतियोगिताको विजेताले ३५ लाख रुपैयाँ प्राप्त गर्नेछन् । उपविजेताले १५ लाख रुपैयाँ हात पार्नेछन् । व्यक्तिगत विधाका सबै उत्कृष्ट र उत्कृष्ट युवा खेलाडीले जनही १ लाख रुपैया हात पार्नेछन् । यस्तै हरेक खेलको प्लेयर अफ दि म्याचले २५ हजार तथा हरेक खेलको इमर्जिङ प्लेयर अफ दि म्याचले १० हजार रुपैयाँ पाउनेछन् ।