काठमाडौं (हाम्रो खेलकुद) – १० खेलाडीमा समेटिएको एफसी चितवनलाई पराजित गर्दै पोखरा थन्डर्सले खुकुरी नेपाल सुपर लिग (एनएसएल) मा शीर्ष चारमा पर्ने सम्भावना जीवितै राखेको छ ।

१–० ले पछि परेको अवस्थामा पोखराले १० खेलाडीमा समेटिएको चितवनलाई २–१ ले पराजित गर्दै पोखराले प्ले अफमा पर्ने सम्भावना जीवित राखेको हो । पोखरासँगको हारसँगै चितवन लिग चरणको एक खेल बाँकी छँदै बाहिरिएको छ ।

जितपछि पोखरा ६ खेलबाट ८ अंक जोडेर तेस्रो स्थानमा उक्लिएको छ । पराजित चितवनले ५ खेलबाट २ अंक जोड्यो । लिगको अन्तिम खेलमा जित हात पारेपनि चितवनलाई शीर्ष चारमा पुग्न पर्याप्त हुनेछैन ।

त्रिपुरेश्वरस्थित दशरथ रंगशालामा शुक्रबार भएको खेलमा पोखराको जितमा नवयुग श्रेष्ठ र राफय रिमगागोले गोल गरे । चितवनका शिशिर लेखीको गोल सान्त्वना बन्यो । खेलको छैटौ मिनेटमा गोरान जर्काेभिचको प्रहार दोस्रो बारबाट थोरै बाहिरिदा एफसी चितवन अग्रता लिनबाट चुक्यो ।

१५औं मिनेटमा सुनिल श्रेष्ठको प्रहारलाई पोखरा थन्डर्सका गोलरक्षक दिप कार्कीले पञ्च गर्दै बचाए । १८औं मिनेटमा नितिन थापाको पेनाल्टी बक्सबाहिरको प्रहार पोस्ट नजिकैबाट बाहिरिदा पोखरा अग्रता लिनबाट चुक्यो । २७औं मिनेटमा रवि पासवानको क्रसमा आयुष घलानले पेनाल्टी बक्समा सुवर्ण अवसर चुकाउँदा पोखराले अग्रता लिन सकेन ।

५९औं मिनेटमा जर्जप्रिन्स कार्कीको पेनाल्टी बक्सबाहिरको सशक्त प्रहारलाई गोलरक्षक दिप कार्कीले डाइभ दिनै सुन्दर बचाउ गरे । ६८औं मिनेटमा मान बहादुर तामाङको पासमा मोउसा अब्बाले चलाखीपुर्ण रुपमा बललाई अघि बढाउदै वान भर्सेस वानको अवस्थामा आफैले प्रहार नगरी कटब्याक गर्दा पोखरा अग्रता लिनबाट चुक्यो ।

७०औं मिनेटमा सिमन्त थापाको क्रसलाई डिफेन्डरले क्लियर गर्न नसकेको बललाई रुप बहादुर लामाले नियन्त्रण लिदै पेनँलटी बक्सभित्रबाट गरेको प्रहार क्रस बारमा लागेर फर्कदा चितवन अग्रता लिनबाट चुक्यो । ७२औं मिनेटमा शिशिर लेखीले दर्शनीय गोल गर्दै चितवनलाई अग्रता दिलाए ।

८२औं मिनेटमा गोलरक्षक विशाल सुनार सिधै रातो कार्ड खाँदै मैदानबाट बाहिरिएपछि पोखरा खेलमा फर्किएको थियो । नितिन थापाको लामो पासलाई नवयुग श्रेष्ठले भेट्नुअघि गोलरक्षक विशाल सुनारले पेनाल्टी बक्सबाहिर (आर्क) मा आएर बल पञ्च गरेपछि रेफ्री प्रज्वल क्षेत्रीले उनलाई सिधै रातो कार्ड देखाएको थियो । त्यसको फाइदा पोखराले उठाउन सफल भयो । त्यसमै प्राप्त फ्रिकिकमा ८६औं मिनेटमा नवयुग श्रेष्ठले फ्रिकिकमा सिधै गोल गर्दै खेललाई १–१ गोलको बराबरीमा ल्याए ।

नवयुगको फ्रिकिकलाई सब्सिच्युट गोलरक्षक विश्वास चौधरीले सही डाइभ दिएपनि बचाउन सकेन । इन्ज्युरी समयको थप गरिएको चौथो मिनेटमा राफयल रिमगागोले गोल गर्दै पोखरालाई २–१ को रोमाञ्चक पूनरागमन जित दिलाए । रवि पासवानले दिएको पासमा पहिलो प्रहार गर्न नसक्दा दोस्रो प्रहारमा गोल गर्न सफल भएको थियो ।

चितवनका शिशिर लेखी खेलको इमर्जिङ खेलाडी घोषित भए । उनले १० हजार रुपैयाँ हात पारे । पोखरा थन्डर्सका रवि पासवान प्लेयर अफ दि म्याच घोषित भए उनले २५ हजार रुपैया हात पारे । लिगमा शनिबार विराटनगर र ललितपुर तथा धनगढी र बुटवलबीच प्रतिस्पर्धा हुनेछ ।

धनगढी एफसी र काठमाडौं रेजर्सको प्ले अफमा स्थान बनाइसकेको छ । धनगढी १० अंक जोडेर शीर्ष स्थानमा रहँदा समान १० अंक नै भएपनि काठमाडौं हेड टु हेडमा दोस्रो स्थानमा छ । विराटनगर ७ अंक जोडेर तेस्रो स्थानमा रहेको छ । लिगमा शीर्ष दुई स्थान हासिल गर्ने टोलीले फाइनल प्रवेशका लागि २८ बैशाखमा खेल्नेछ । यस खेलमा पराजित हुने टोलीले २९ बैशाखमा तेस्रो र चौथो हुने टोलीबीचको विजेतासँग पुनः फाइनल प्रवेशका लागि ३० बैशाखमा खेल्नेछ । फाइनल १ जेठमा हुनेछ ।

नेपाल स्पोर्टस म्यानेजमेन्टले आयोजना तथा अखिल नेपाल फुटबल संघको प्राविधिक सहयोगमा हुने एनएसएलमा ७ शहरका ७ टोलीको सहभागिता रहेको छ । राउण्ड रोबिनको आधारमा हुने लिग १ जेठसम्म सञ्चालन हुनेछ । एनएसएलमा विराटनगर सिटी फुटबल क्लब, काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, धनगढी एफसी, पोखरा थन्डर्स र बुटवल लुम्बिनी एफसी रहेका छन् ।

प्रतियोगिताको विजेताले ३५ लाख रुपैयाँ प्राप्त गर्नेछन् । उपविजेताले १५ लाख रुपैयाँ हात पार्नेछन् । व्यक्तिगत विधाका सबै उत्कृष्ट र उत्कृष्ट युवा खेलाडीले जनही १ लाख रुपैया हात पार्नेछन् । यस्तै हरेक खेलको प्लेयर अफ दि म्याचले २५ हजार तथा हरेक खेलको इमर्जिङ प्लेयर अफ दि म्याचले १० हजार रुपैयाँ पाउनेछन् ।