काठमाडौं (हाम्रो खेलकुद) – २–० ले पछि परेको अवस्थामा मेसौके ओलुमोउ र स्टेफन विनोङ समिरले गोल गरेपछि काठमाडौं रेजर्सले खुकरी नेपाल सुपर लिग (एनएसएल) मा विराटनगर सिटी एफसीविरुद्ध पहिलो हाफमा अग्रता लिएको छ ।

मैसौके ओलुमोउले दुई मिनेटको अन्तरमा दुई गोल र स्टेफन समिरले गोल गरेपछि काठमाडौं रेजर्सले पहिलो हाफमा विराटनरगसिटी एफसीविरुद्ध पहिलो हाफमा ३–२ को रोमाञ्चक अग्रता लिएको हो । त्रिपुरेश्वरस्थित दशरथ रंगशालामा भएको खेलको छैटौं मिनेटमा नाइजेरियन खेलाडी एडेलाजा सोमेडेको गोल गर्दै विराटनगर सिटी एफसीलाई १–० को अग्रता दिलाए । रन्जित धिमालको क्रसमा एडेलाजाले फ्लिक गर्दै उत्कृष्ट गोल गर्न सफल भएका थिए ।

१४औं मिनेटमा एडेलाजाको हेडरलाई आशिष गुरुङले क्लियर गर्दै बचाए । १६औं मिनेटमा एडेलाजाको क्रसमा पेड्रो मान्जीको ओभर हेड किक पोस्टबाट थोरै माथि बाहिरिदा विराटनगर अग्रता दोब्बर पार्नबाट चुक्यो । २५औं मिनेटमा सुनिल बलको प्रहारलाई गोलरक्षक विकेश कुथुले ब्लक गर्दै विराटनगरको गोल टारे ।

३३औं मिनेटमा पेड्रो मान्जीले गोल गर्दै विराटनगरको अग्रता दोब्बर पारे । सन्तोष तामाङको पासमा मान्जीले अफसाइड बिट ट्याप गर्दै गोलरक्षक विकेश कुथ अघि बढेको अवस्थामा गोल गर्न सफल भएका थिए । आशिष गुरुङले बचाउने प्रयास गरेपनि सफल भएन ।

३५औं मिनेटमा मेसौके ओलोउमोउले गोल गर्दै खेललाई २–१ को अवस्थामा ल्याए । उनले गरेको प्रहार गोलरक्षकको हातमा लाग्दै गोलमा परिणत भएको थियो । ३६औं मिनेटमा मेसौकेले ओलोउमोउले व्यक्तिगत दोस्रो गोल गर्दै खेललाई २–२ गोलको बराबरीमा ल्याए । स्टेफन विनोङ समिरको पासमा विक्रम धिमाललाई बिट गर्दै गरेको प्रहार टप कर्नरमा गोल हुदा होचा कदका गोलरक्षक किशोर गिरीले रोक्ने कुनै अवसर नै पाएनन् ।

४१औं मिनेटमा स्टेफेन विनोङ समिरले गोल गर्दै काठमाडौंलाई ३–२ को अग्रता दिलाए । उनले फ्रिकिकमा सिधै गोल गर्न सफल भएका थिए । इन्ज्युरी समयको थप गरिएको तेस्रो मिनेटमा मेसौकेको क्रस पासमा सन्जोक राईको हेडर पोस्ट नजिकैबाट बाहिरियो ।