काठमाडौं (हाम्रो खेलकुद) – खुकरी नेपाल सुपर लिग (एनएसएल) मा आज बिहीबार पाँचौ राउन्ड अन्तरगत दुई खेलमा प्रतिस्पर्धा हुँदैछ । त्रिपुरेश्वरस्थित दशरथ रंगशालामा साँझ ५:३० बजे हुने खेलमा तथा काठमाडौं रेजर्स र विराटनगर सिटी एफसी खेल्दैछन् ।

त्यसअघि दशरथ रंगशालामा ललितपुर सिटी एफसी र बुटवल लुम्विनीबीच खेल हुनेछ । काठमाडौं रेजर्स र विराटनगर दुवैको लागि यो खेल निकै महत्वुपर्ण छ । समान ७ अंक रहेपनि गोलअन्तरमा विराटनगर दोस्रो तथा काठमाडौं तेस्रो स्थानमा छ ।

यस्तो अवस्थामा दुवै टोलीको लागि शीर्ष चारमा स्थान पक्का गर्न जित बाहेकको विकल्प छैन । हार या बराबरीले दुवै टोलीको शीर्षचारको यात्रा कठिन बन्नेछ । काठमाडौंलाई हराउन सके विराटनगरले अंक तालिकाको शीर्षस्थानमा उक्लदै प्लेअफमा स्थान पक्का गर्नेछ । बुधबार पोखरालाई १–० ले पराजित गर्दै धनगढीले प्ले अफमा स्थान पक्का गरिसकेको छ ।

रन्जित धिमालको कप्तानीमा रहेको विराटनगरसँग गोलरक्षक किशोर गिरी, विक्रम धिमाल, सरोज दाहाल, सुनिल बल, सुरज ज्यु ठकुरी, विजय धिमाल, सन्तोष तामाङ, हेम तामाङ, सुशिल लामा, मनिष डाँगी, सुनिल खड्का र निरकुमार राई रहेका छन् । विदेशी खेलाडीको रुपमा पेड्रो मान्जी, एडेलाजा सोमिडे र अलरिच सिवे रहेका छन् । लयमा रहेका सन्तोष तामाङले लिगमा तीन तथा पेड्रो मान्जीले दुई गोल गरिसकेका छन् । उनीहरु नै काठमाडौंविरुद्ध टोलीका हतियार हुनेछ ।

यता, काठमाडौंलाई पनि शीर्षचारमा पनको लागि विराटनगरविरुद्ध जितको खाँचो छ । टोलीसँग मार्की खेलाडी तथा कप्तानको रुपमा गोलरक्षक विकेश कुथु रहँदा विदेशी खेलाडीमा मेसौके ओलुमोउ, स्टेफेन समिर र फ्लोरेन्ट कोर्वा रहेका छन् । यस्तै तेज तामाङ, सन्जोक राई, सुदिप शिख्रकार, राजन गुरुङ, विश्वास श्रेष्ठ, बिमल पाण्डेय, आशिष गुरुङ, विनय श्रेष्ठ, रुमेश बर्तौला, अन्जन राई, पृथ्वी चौधरी, सुदिल राई र प्रेजेन तामाङ टोलीमा छन् ।

धनगढी एफसीले एनएसएलको प्ले अफमा स्थान पक्का गरिसकेको छ । शीर्षस्थानमा रहेको धनगढीको ५ खेलबाट १० अंक छ । समान ७ अंक रहँदा विराटनगर सिटी एफसी दोस्रो तथा काठमाडौं रेजर्स तेस्रो स्थानमा रहेको छ । समान ५ अंक रहेपनि बुटवल लुम्विनी चौथो तथा पोखरा पाँचौ स्थानमा रहेको छ । ललितपुर ३ अंक जोडेर छैटौ तथा चितवन २ अंक जोडेर पुछारमा छ ।

लिगमा शीर्ष दुई स्थान हासिल गर्ने टोलीले फाइनल प्रवेशका लागि २८ वैशाखमा खेल्नेछ । यस खेलमा पराजित हुने टोलीले २९ वैशाखमा तेस्रो र चौथो हुने टोलीबीचको विजेतासँग पुनः फाइनल प्रवेशका लागि ३० वैशाखमा खेल हुनेछ । फाइनल १ जेठमा हुनेछ ।

नेपाल स्पोर्टस म्यानेजमेन्टले आयोजना तथा अखिल नेपाल फुटबल संघको प्राविधिक सहयोगमा हुने एनएसएलमा ७ शहरका ७ टोलीको सहभागिता रहेको छ । राउण्ड रोबिनको आधारमा हुने लिग १ जेठसम्म सञ्चालन हुनेछ । एनएसएलमा विराटनगर सिटी फुटबल क्लब, काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, धनगढी एफसी, पोखरा थन्डर्स र बुटवल लुम्बिनी एफसी रहेका छन् ।

प्रतियोगिताको विजेताले ३५ लाख रुपैयाँ प्राप्त गर्नेछन् । उपविजेताले १५ लाख रुपैयाँ हात पार्नेछन् । व्यक्तिगत विधाका सबै उत्कृष्ट र उत्कृष्ट युवा खेलाडीले जनही १ लाख रुपैया हात पार्नेछन् । यस्तै हरेक खेलको प्लेयर अफ दि म्याचले २५ हजार तथा हरेक खेलको इमर्जिङ प्लेयर अफ दि म्याचले १० हजार रुपैयाँ पाउनेछन् ।