काठमाडौं (हाम्रो खेलकुद) – खुकरी नेपाल सुपर लिग (एनएसएल) मा आज बिहीबार पाँचौ राउन्ड अन्तरगत दुई खेलमा प्रतिस्पर्धा हुँदैछ ।

ललितपुर सिटी एफसी र बुटवल लुम्विनीबीचको खेल दिउँसो २ः३० बजे तथा काठमाडौं रेजर्स र विराटनगर सिटी एफसीबीचको खेल साँझ ५ः३० बजे हुनेछ । दुवै खेल त्रिपुरेश्वरस्थित दशरथ रंगशालामा हुनेछ ।

३ अंक जोडेर छैटौं स्थानमा रहेको ललितपुर सिटी बुटवल लुम्विनीलाई हराउँदै शीर्ष चारको सम्भावनालाई जीवितै राख्ने दाउमा हुनेछ । लिगमा चौथो चरणको खेल सकिदा एक खेलमा पनि जित निकाल्न नसकेको ललितपुर पहिलो जितको खोजीमा हुनेछ । यस खेलमा पराजित भए ललितपुर लिग चरणबाट नै बाहिरिनेछ ।

ललितपुरसँग मार्की खेलाडी तथा कप्तान अन्जन विष्ट कमल श्रेष्ठ, प्रवेश दनुवार, एरिक विष्ट, नविन लामा, विमल राना, निरोज बस्नेत, गोलरक्षक अर्पण कार्की रहँदा विदेशी खेलाडीमा नुर्लान नोभ्रुजोभ, भिलिम पोसिन्कोभिक र पिटर सेगुन छन् ।

यस्तै मिक्चेन तामाङ, सरोज योन्जन लामा, रन्जन विष्ट, पाल्साङ लामा, गौरव बुढाथोकी र डोना थापा पनि टोलीमा छन् । ललितपुरले चार खेलमा ३ बराबरी र एक हारको नतिजा निकालेको छ । ललितपुर पहिलो खेलमा काठमाडौं रेजर्ससँग १–० ले पराजित भएको थियो । चितवन र धनगढीसँग १–१ गोलको बराबरी खेल्दा पोखरासँग गोलरहित बराबरी खेलेको थियो ।

लगातारको खराव नतिजासँगै ललिचपुरले आफ्ना मुख्य प्रशिक्षक प्रदिप हुमागाईंलाई पोखरासँगको खेलपछि बर्खास्त गरेको थियो । उनको स्थानमा सहायक प्रशिक्षक राजु तामाङले ललितपुरको टचलाइन सम्हाल्नेछन् ।

यता, बुटवल लुम्विनी पनि ललितपुरलाई हराउँदै शीर्ष चारको यात्रालाई थप मजवुत बनाउँने योजनामा हुनेछ । बुटवल लुम्विनी चार खेलबाट ५ अंक जोडेर चौथो स्थानमा छ । विशाल श्रेष्ठको कप्तानीमा रहेको बुटवल लुम्विनीसँग विराज महर्जन, लक्ष्मण रुचाल, रविन श्रेष्ठ, सेसेहाङ आङदेम्बे, मान बहादुर परियार, अमिर श्रेष्ठ, आशिष लामा, सुमन लामा, जय गुरुङ र रन्दिप पौडेल, ओमोलाजा नुरेन करिम र विलियम ओपोकु रहेका छन् । बुटवल लुम्विनीले चोट बोकेका अर्मान्डको स्थानमा राष्ट्रिय टोलीका फरवार्ड अभिषेक रिजाललाई अनुबन्ध गरेको छ । उनले ललितपुरविरुद्ध खेल्ने सम्भावना छ ।

धनगढी एफसीले एनएसएलको प्ले अफमा स्थान पक्का गरिसकेको छ । शीर्षस्थानमा रहेको धनगढीको ५ खेलबाट १० अंक छ । समान ७ अंक रहँदा विराटनगर सिटी एफसी दोस्रो तथा काठमाडौं रेजर्स तेस्रो स्थानमा रहेको छ । समान ५ अंक रहेपनि बुटवल लुम्विनी चौथो तथा पोखरा पाँचौ स्थानमा रहेको छ । ललितपुर ३ अंक जोडेर छैटौ तथा चितवन २ अंक जोडेर पुछारमा छ ।

लिगमा शीर्ष दुई स्थान हासिल गर्ने टोलीले फाइनल प्रवेशका लागि २८ बैशाखमा खेल्नेछ । यस खेलमा पराजित हुने टोलीले २९ बैशाखमा तेस्रो र चौथो हुने टोलीबीचको विजेतासँग पुनः फाइनल प्रवेशका लागि ३० बैशाखमा खेल्नेछ । फाइनल १ जेठमा हुनेछ ।

नेपाल स्पोर्टस म्यानेजमेन्टले आयोजना तथा अखिल नेपाल फुटबल संघको प्राविधिक सहयोगमा हुने एनएसएलमा ७ शहरका ७ टोलीको सहभागिता रहेको छ । राउण्ड रोबिनको आधारमा हुने लिग १ जेठसम्म सञ्चालन हुनेछ । एनएसएलमा विराटनगर सिटी फुटबल क्लब, काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, धनगढी एफसी, पोखरा थन्डर्स र बुटवल लुम्बिनी एफसी रहेका छन् ।

प्रतियोगिताको विजेताले ३५ लाख रुपैयाँ प्राप्त गर्नेछन् । उपविजेताले १५ लाख रुपैयाँ हात पार्नेछन् । व्यक्तिगत विधाका सबै उत्कृष्ट र उत्कृष्ट युवा खेलाडीले जनही १ लाख रुपैया हात पार्नेछन् । यस्तै हरेक खेलको प्लेयर अफ दि म्याचले २५ हजार तथा हरेक खेलको इमर्जिङ प्लेयर अफ दि म्याचले १० हजार रुपैयाँ पाउनेछन् ।