काठमाडौं (हाम्रो खेलकुद) – बुटवल लुम्विनी एफसी र विराटनगर सिटी एफसीले खुकुरी नेपाल सुपर लिग (एनएसएल) मा रोमाञ्चक बराबरी खेलेका छन् ।

त्रिपुरेश्वरस्थित दशरथ रंगशालामा शनिबार भएको खेलमा बुटवल लुम्बिनी र विराटनगरले २–२ गोलको रोमाञ्चक बराबरी खेलेका हुन् । इन्ज्युरी समयको थप गरिएको दोस्रो मिनेटमा सुनिल खड्काले गोल गर्दै विराटनरगलाई हारबाट जोगाएका हुन् ।

बुटवल लुम्विनीको जितमा ओमोलाजा नुरेन करिम र लक्ष्मण रुचालले गोल गरे । विराटनगरका पेड्रो मान्जी र सुनिल खड्काले बराबरी गोल फर्काए । खेलको छैटौ मिनेटमा नुरेनले गोल गर्दै बुटवल लुम्विनीलाई अग्रता दिलाएका हुन् ।

पाँचौ मिनेटमा अमिर श्रेष्ठको फ्रिकिकलाई विराटनगर सिटीका गोलरक्षक किशोर गिरीले पञ्च गर्दै बचाए । त्यसमै प्राप्त कर्नरमा लक्ष्मण रुचालको कर्नरमा अर्मान्डको हेडर अलरिव सिवेलाई लाग्दै फर्किएको बललाई ओमोलाजाले उत्कृष्ट फिनिस गरेका थिए ।

२६औं मिनेटमा पेड्रो मान्जी तीन डिफेन्डरबीचबाट गरेको प्रहारलाई बुटवल लुम्विनीका गोलरक्षक तथा कप्तान विशाल श्रेष्ठले डाइभ दिदै बचाए । ३०औं मिनेटमा विलियम ओपोकुको प्रहारलाई गोलरक्षक किशोर गिरीले मुस्किलले बचाउदा बुटवल लुम्विनी अग्रता दोब्बर पार्नबाट चुक्यो ।

४०औं मिनेटमा अमिर श्रेष्ठले पेनाल्टी बक्समा सुवर्ण अवसर पाएपनि सदुपयोग गर्न सकेन । ४२औं मिनेटमा पेड्रो मान्जील गाल गर्दै खेललाई १–१ गोलको बराबरीमा ल्याए । एडेलाजा सोमिडेको पासलाई पेड्रो मान्जीले नियन्त्रणमा लिदै पेनाल्टी बक्सबाहिरबाट उत्कृष्ट गोल गर्न सफल भएका थिए ।

६७औं मिनेटमा लक्ष्मण रुचालले उत्कृष्ट गोल गर्दै बुटवल लुम्विनीलाई २–१ को अग्रता दिलाए । विलियम ओपोकुको पासमा अनमार्क रहेका लक्ष्मण रुचालले सिक्स यार्ड बक्सनजिकैबाट भलीमार्फत सुन्दर गोल गरेका थिए । इन्ज्युरी समयको थप गरिएको दोस्रो मिनेटमा सन्तोष तामाङको फ्रिकिकमा सुनिल खड्काले गोल गर्दै विराटनगरलाई हारबाट जोगए ।

बुटवल लुम्विनीका सुमन लामा इमर्जिङ खेलाडी घोषित भए । उनले १० हजार रुपैयाँ हात पारे । विराटनगर सिटी एफसीका पेड्रो मान्जी प्लेयर अफ दि म्याच घोषित भए । उनले २५ हजार रुपैयाँ हात पारे ।

बराबरीपछि बुटवल लुम्विनी ३ खेलबाट ५ अंक जोडेर दोस्रो स्थनमा रहेको छ। शीर्षस्थानको धनगढीको ७ अंक छ । विराटनगर ३ खेलबाट ४ अंक जोडेर तेस्रो स्थानमा उक्लिएको छ ।

एनएसएलमा आइतबार पोखरा थन्डर्स र ललितपुर सिटी एफसीबीच साँझ ५ः३० बजे प्रतिस्पर्धा हुनेछ । नेपाल स्पोर्टस म्यानेजमेन्टले आयोजना तथा अखिल नेपाल फुटबल संघको प्राविधिक सहयोगमा हुने एनएसएलमा ७ शहरका ७ टोलीको सहभागिता रहेको छ । राउण्ड रोबिनको आधारमा हुने लिग १ जेठसम्म सञ्चालन हुनेछ ।

एनएसएलमा विराटनगर सिटी फुटबल क्लब, काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, धनगढी एफसी, पोखरा थन्डर्स र बुटवल लुम्बिनी एफसी रहेका छन् । प्रतियोगिताको विजेताले ३५ लाख रुपैयाँ प्राप्त गर्नेछन् । उपविजेताले १५ लाख रुपैयाँ हात पार्नेछन् । व्यक्तिगत विधाका सबै उत्कृष्ट र उत्कृष्ट युवा खेलाडीले जनही १ लाख रुपैया हात पार्नेछन् । यस्तै हरेक खेलको प्लेयर अफ दि म्याचले २५ हजार तथा हरेक खेलको इमर्जिङ प्लेयर अफ दि म्याचले १० हजार रुपैयाँ पाउनेछन् ।