काठमाडौं (हाम्रो खेलकुद) – बुटवल लुम्विनी एफसी र विराटनगर सिटी एफसीले खुकुरी नेपाल सुपर लिग (एनएसएल) को पहिलो हाफमा बराबरी खेलेका छन् ।

त्रिपुरेश्वरस्थित दशरथ रंगशालामा शनिबार भएको खेलको पहिलो हाफमा बुटवल लुम्विनी एफसी र विराटनगर सिटी एफसीले १–१ गोलको बराबरी खेलेका हुन् । ओमोलाजा नुरेन करिमको गोलबाट बुटवल लुम्विनीले अग्रता लिदा पेड्रो मान्जीको गोलबाट विराटनगर खेलमा फर्किएको थियो ।

खेलको छैटौ मिनेटमा नुरेनले गोल गर्दै बुटवल लुम्विनीलाई अग्रता दिलाएका हुन् । पाँचौ मिनेटमा अमिर श्रेष्ठको फ्रिकिकलाई विराटनगर सिटीका गोलरक्षक किशोर गिरीले पञ्च गर्दै बचाए । त्यसमै प्राप्त कर्नरमा लक्ष्मण रुचालको कर्नरमा अर्मान्डको हेडर अलरिव सिवेलाई लाग्दै फर्किएको बललाई ओमोलाजाले उत्कृष्ट फिनिस गरेका थिए ।

२६औं मिनेटमा पेड्रो मान्जी तीन डिफेन्डरबीचबाट गरेको प्रहारलाई बुटवल लुम्विनीका गोलरक्षक तथा कप्तान विशाल श्रेष्ठले डाइभ दिदै बचाए । ३०औं मिनेटमा विलियम ओपोकुको प्रहारलाई गोलरक्षक किशोर गिरीले मुस्किलले बचाउदा बुटवल लुम्विनी अग्रता दोब्बर पार्नबाट चुक्यो । ४०औं मिनेटमा अमिर श्रेष्ठले पेनाल्टी बक्समा सुवर्ण अवसर पाएपनि सदुपयोग गर्न सकेन ।

४२औं मिनेटमा पेड्रो मान्जील गाल गर्दै खेललाई १–१ गोलको बराबरीमा ल्याए । एडेलाजा सोमिडेको पासलाई पेड्रो मान्जीले नियन्त्रणमा लिदै पेनाल्टी बक्सबाहिरबाट उत्कृष्ट गोल गर्न सफल भएका थिए ।दोस्रो हाफ केहीबेरमा शुरु हुनेछ ।

नेपाल स्पोर्टस म्यानेजमेन्टले आयोजना तथा अखिल नेपाल फुटबल संघको प्राविधिक सहयोगमा हुने एनएसएलमा ७ शहरका ७ टोलीको सहभागिता रहेको छ । राउण्ड रोबिनको आधारमा हुने लिग १ जेठसम्म सञ्चालन हुनेछ । एनएसएलमा विराटनगर सिटी फुटबल क्लब, काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, धनगढी एफसी, पोखरा थन्डर्स र बुटवल लुम्बिनी एफसी रहेका छन् ।

प्रतियोगिताको विजेताले ३५ लाख रुपैयाँ प्राप्त गर्नेछन् । उपविजेताले १५ लाख रुपैयाँ हात पार्नेछन् । व्यक्तिगत विधाका सबै उत्कृष्ट र उत्कृष्ट युवा खेलाडीले जनही १ लाख रुपैया हात पार्नेछन् । यस्तै हरेक खेलको प्लेयर अफ दि म्याचले २५ हजार तथा हरेक खेलको इमर्जिङ प्लेयर अफ दि म्याचले १० हजार रुपैयाँ पाउनेछन् ।