काठमाडौं (हाम्रो खेलकुद) – धनगढी एफसी र एफसी चितवनले खुकुरी नेपाल सुपर लिग (एनएसएल) मा पहिलो हाफमा बराबरी खेलेका छन् । धनगढी र चितवनले गोलरहित बराबरी खेलेका हुन्

त्रिपुरेश्वरस्थित दशरथ रंगशालामा शनिबार भएको खेलको २३औं मिनेटमा शिशिर लेखीको क्रस पासमा गोरान जर्काेभिचको प्रहारलाई गोलरक्षक किरण चेम्जोङले नियन्त्रणमा लिन नसकेको बललाई रिवाउन्डमा जर्ज प्रिन्स कार्कीको भली प्रहार क्रसबारमा लागेर बाहिरिदा एफसी चितवन अग्रता लिनबाट चुक्यो ।

२८औं मिनेटमा इलसायद सावनको प्रहार आकासिदा चितवनले अग्रता लिन सकेन । ३२औं मिनेटमा जर्जप्रिन्स कार्कीले काउन्टर अट्याकमा पेनाल्टी बक्समा दुई डिफेन्डरलाई बिट गर्दै गरेको प्रहार दोस्रो बारबाट थोरै बाहिरियो ।

३६औं मिनेटमा जर्जप्रिन्स कार्कीको झन्डै ३० यार्ड टाढाको शक्तिशाली प्रहार क्रसबारमा लागेर बाहिरिदा चितवन अग्रता लिनबाट चुक्यो । धनगढीले पहिलो हाफमा चितवनको पोस्टमा खासै आक्रमण बुन्न सकेको छैन ।

धनगढी ३ खेलबाट ४ अंक जोडेर दोस्रो स्थानमा रहेको छ । धनगढीले तीन खेल खेल्दा समान १ जित, बराबरी र हारको नतिजा निकालेको छ । अपराजित रहेको चितवन दुई खेलबाट २ अंक जोडेर छैटौं स्थानमा रहेको छ । लिगको तेस्रो चरणको खेल जारी रहँदा समान ४ अंक रहँदा गोल अन्तरमा बुटवल लुम्विनी, पोखरा र काठमाडौं क्रमश शीर्ष चारमा रहेका छन् । विराटनगर ३ अंक जोडेर पाँचौ स्थानमा रहँदा समान दुई अंक जोडेको चितवन र ललितपुर छैटौ र सातौ स्थानमा रहेको छ ।

नेपाल स्पोर्टस म्यानेजमेन्टले आयोजना तथा अखिल नेपाल फुटबल संघको प्राविधिक सहयोगमा हुने एनएसएलमा ७ शहरका ७ टोलीको सहभागिता रहेको छ । राउण्ड रोबिनको आधारमा हुने लिग १ जेठसम्म सञ्चालन हुनेछ ।

एनएसएलमा विराटनगर सिटी फुटबल क्लब, काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, धनगढी एफसी, पोखरा थन्डर्स र बुटवल लुम्बिनी एफसी रहेका छन् ।

प्रतियोगिताको विजेताले ३५ लाख रुपैयाँ प्राप्त गर्नेछन् । उपविजेताले १५ लाख रुपैयाँ हात पार्नेछन् । व्यक्तिगत विधाका सबै उत्कृष्ट र उत्कृष्ट युवा खेलाडीले जनही १ लाख रुपैया हात पार्नेछन् । यस्तै हरेक खेलको प्लेयर अफ दि म्याचले २५ हजार तथा हरेक खेलको इमर्जिङ प्लेयर अफ दि म्याचले १० हजार रुपैयाँ पाउनेछन् ।