काठमाडौं (हाम्रो खेलकुद) – काठमाडौं रेजर्स र पोखरा थन्डर्सले खुकुरी नेपाल सुपर लिग (एनएसएल) मा गोलरहित बराबरी खेलेका छन् ।

त्रिपुरेश्वरस्थित दशरथ रंगशालामा शुक्रबार भएको खेलमा दुवै टोलीले गोलका सुवर्ण अवसर खेर पाल्दा गोलरहित बराबरी खेल्दै अंक बाँडेको हो । खेलको पाँचौ मिनेटमा मौसा अब्बाले वान भर्सेस वानको अवस्थामा प्रहार गर्न ढिला गर्दा गोलरक्षक विकेश कुथुले बचाउँदा पोखरा अग्रता लिनबाट चुक्यो ।

१५औं मिनेटमा मौसा अब्बाको पेनाल्टी बक्सबाहिरको फ्रिकिकलाई डिफेन्डरले क्लियर गर्दै काठमाडौंको खतरा टारे । २०औं मिनेटमा मौसा अब्बाको पासमा नवयुग श्रेष्ठले सुवर्ण अवसर गुमाउँदा पोखरा अग्रता लिनबाट चुक्यो । ३०औं मिनेटमा नवयुग श्रेष्ठले अर्काे सुवर्ण अवसर खेर फाल्दा डिफेन्डरले क्लियर गरिदिए ।

७१औं मिनेटमा मेसौके ओलोउमोउको फ्रिकिकको पोस्टबाट बाहिरियो । लगत्तै स्टेफन विनोङको पासमा मेसौके ओलोउमोउको प्रहार पहिलो बारबाट बाहिरिदा काठमाडौं अग्रता लिनबाट चुक्यो । ७७औं मिनेटमा विश्वास श्रेष्ठको पासमा सन्जोक राईको हेडरलाई गोलरक्षक दिप कार्कीले मुस्किलले बचाए ।

८१औं मिनेटमा काउन्टर अट्याकमा मेसौके ओलोउमोउको गोलरक्षक दिप कार्कीलाई बिट गर्दै गरेको प्रहार बाहिरिदा काठमाडौंले अग्रता लिने अवसर गुमायो । ८८औं मिनेटमा मेसौके ओलोउमोउको प्रहारलाई डिफेन्डरले क्लियर गर्दा राम्रोसँग क्लियर हुन नसकेको बललाई सन्जोक राईले सिक्स यार्ड बक्समा अवसर पाएपनि सदुपयोग गर्न नसक्दा काठमाडौं जितबाट वञ्चित बन्यो ।

बराबरीपछि पोखरा ३ खेलबाट ४ अंक जोडेर तेस्रो स्थानमा उक्लदा काठमाडौको पनि समान ३ खेलबाट ४ अंक रहेपनि चौथो स्थानमा रहेको छ । बुटवल लुम्विनी र धनगढीको पनि चार अंक रहेपनि गोल अन्तरमा पहिलो र दोस्रो स्थानमा रहेको छ ।

काठमाडौं रेजर्सका राजन गुरुङ इमर्जिङ प्लेयर अफ दि म्याच चुनिए । उनले १० हजार रुपैयाँ हात पारे । पोखरा थन्डर्सका दिम मोक्तान प्लेयर अफ दि म्याच चुनिए । उनले २५ हजार रुपैयाँ हात पारे ।

लिगमा शुक्रबार दुई खेल हुनेछ । धनगढी र चितवनबीच दिउँसो २ः३० बजे तथा दोस्रो खेलमा बुटवल लुम्विनी र विराटनगरबीच खेल हुनेछ ।
नेपाल स्पोर्टस म्यानेजमेन्टले आयोजना तथा अखिल नेपाल फुटबल संघको प्राविधिक सहयोगमा हुने एनएसएलमा ७ शहरका ७ टोलीको सहभागिता रहेको छ ।

राउण्ड रोबिनको आधारमा हुने लिग १ जेठसम्म सञ्चालन हुनेछ । एनएसएलमा विराटनगर सिटी फुटबल क्लब, काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, धनगढी एफसी, पोखरा थन्डर्स र बुटवल लुम्बिनी एफसी रहेका छन् ।

प्रतियोगिताको विजेताले ३५ लाख रुपैयाँ प्राप्त गर्नेछन् । उपविजेताले १५ लाख रुपैयाँ हात पार्नेछन् । व्यक्तिगत विधाका सबै उत्कृष्ट र उत्कृष्ट युवा खेलाडीले जनही १ लाख रुपैया हात पार्नेछन् । यस्तै हरेक खेलको प्लेयर अफ दि म्याचले २५ हजार तथा हरेक खेलको इमर्जिङ प्लेयर अफ दि म्याचले १० हजार रुपैयाँ पाउनेछन् ।